Hər bir yenilik çoxdan unudulmuş köhnəlikdir, deyirlər.
Bakuplus.az xəbər verir ki, Nardaranın Ləiş bağlarında 18-ci dalan ərazisində quraşdırılmış qırmızı yel dəyirmanı öz işinin öhdəsindən əla gəlir.
Tarixən Abşeron camaatı içməli suyu quyudan çıxarıb. İndi əhali filtrasiya olunmuş su içməyə üstünlük versə də, əkin sahələrində suvarma işləri üçün quyu suyundan istifadə olunur.
Sözügedən ərazidə Bakı Abadlıq Xidmətinə məxsus bitkiçilik müəssisəsinin əməkdaşları da dədə-baba üsullarından faydalanmaq fikrinə düşüblər. Suvarma məqsədilə quyu qazılıb. Quyu suyunu da heç bir enerji sərfiyyatı olmadan, dəyirman vasitəsilə çıxarmaq qərarına gəliblər.
Əldə olunan məlumata görə, eksperiment kimi təqdim olunan ekoloji təmiz layihə sınaqdan yaxşı çıxıb. İndi dəyirman normal qaydada işləyir, əldə olunan enerji quyuda quraşdırılmış kiçik mühərrikin işə düşməsinə kifayət edir. Beləcə, suvarma işinə əlavə vəsait sərf edilmir, həm elektrik enerjisinə, həm də içməli suya qənaət olunur.
Yeni yel dəyirmanı tarixi atribut kimi də göz oxşayır, ənənələri yaşadır, əraziyə də xüsusi kolorit verir.
