Müştərilər bu dəfə Bakının mərkəzində yerləşən “Ferma Art” restoranının natəmizliyindən şikayətçidir.
Bakuplus.az-a göndərilən görüntülərdə yemək masasının üzərində yenə gəzən tarakan görünür.
Şikayətçinin sözlərinə görə, iaşə obyektinin məsul şəxslərinə narazılıqlarını bildirdikdə, onlar əvvəlcə ödənişin edilməsini tələb ediblər:
“Dedilər əvvəlcə ödənişi edin, daha sonra şikayətinizi deyin. Onsuz da ödəyəcəkdik və ödədik də. Daha sonra müdiriyyəti çağırdıq. Biri gəldi və ödənişi geri qaytarmaq istəyib üzrxahlıq etdilər. “Qonağımız olun” dedilər. Ancaq bundan əvvəl nişanlım inzibatçını çağırmışdı. Sakit şəkildə iradımızı bildirdik ki, tədbir görsünlər. Ancaq oradakı inzibatçı bizi qırağa çəkib “Hamının başına gələ bilər” kimi ifadələr işlətdi. Daha sonra balaca kağız gətirdi ki, şikayətinizi bura yazın. Mən nə üçün şikayətimi balaca kağız parçasına yazmalıyam ki?”.
Müştəri bildirib ki, məsələ ilə bağlı Azərbaycan Qida Təhlükəsizlik Agentliyinə (AQTA) müraciət edib.
Xatırladaq ki, bir neçə gün əvvəl “Özsüt” restoranlar şəbəkəsinin Gənclik filialında da eyni hal yaşanmışdı.
