Bakıda uşaq pornoqrafiyasını yayan 24 yaşlı oğlan tutulub.
Bakuplus.az-ın əldə etdiyi məlumata görə, hadisənin istintaqı Bakı Ağır Cinayətlər Məhkəməsində keçirilib.
Belə ki, 2001-ci il təvəllüdlü Zaur Əliyev (ad şərtidir) yetkinlik yaşına çatmayan şəxsin seksual xarakterli hərəkətlərdə real iştirakını, həmçinin seksual məqsədlərlə yetkinlik yaşına çatmayanların cinsi orqanlarını əks etdirən video materiallardan ibarət uşaq pornoqrafiyasını reklam etməyə başlayıb. Zaur “Telegram”da girişi bütün istifadəçilər üçün açıq olmayan “Hunter” adlı qrup yaradıb. Bu qrupu uşaq pornoqrafiyasını əks etdirən videolar olmasını işarə edən sözlərlə reklam verib və qrupa daxil olan hər kəsə 5 manat məbləğində pul ödəmə tələbi qoyub. Həmin vaxt Zaur Əliyev müğənni Dəniz Əsədovanın yanında çalışırmış.
Zaur Əliyev Azərbaycan Respublikası CM-nin 171-1.2.1-ci (uşaq pornoqrafiyasını yaymaq) maddələri ilə təqsirləndirilib.
Məhkəmədə təqsirləndirilən şəxs qismində dindirilən Zaur Əliyev ona qarşı irəli sürülən ittiham üzrə özünü qismən təqsirli bilməyib. O, ifadəsində göstərib:
“Noyabrın 14-ü Binəqədi rayon Polis İdarəsinin əməkdaşları məni və atamı qeydiyyata alınma üçün idarəyə dəvət etdilər. İdarədə Elnur adlı polisə yaxınlaşdıq. İş bitəndən sonra həyətə çıxdıq. Atam təzədən idarəyə çağırıldı, mən də maşına tərəf getdim. Bu zaman yanımda maşın saxladı, məni məcbur ora əyləşdirdilər və 43-cü polis bölməsinə apardılar. Orada məni məcbur edərək mobil telefonumun şifrəsini istədilər. Lakin mən şifrəni vermədim. Həmin vaxt müğənni Dəniz Əsədovanın yanında işləyirdim. Onun Korrupsiyaya qarşı Mübarizə İdarəsinin əməkdaşları ilə ədavəti olmuşdu. Dəniz Əsədovanın əlində olan sübutlar isə mənim telefonumda idi. Buna görə polislər məni saxlamışdı.
Sonra polisə müqavimətə görə mənə inzibati həbs verdilər. Məhkəmə qərarından sonra məni yenidən hədələyib şifrəmi istədilər. Verməsəm, atamın da həbs olunacağını dedilər. Telefonumun şifrəsini verdim”.
Onun sözlərinə görə, 8 sutkalıq həbsi bitdikdən sonra onun telefonunda pornoqrafik videolar tapılıb:
“Həbsim bitdi, polisin yanına gələndə dedi ki, telefonunda pornoqrafik videolar var. Lakin bunu heç kimə satmamışam. Mənə göndərilən pullara görə “Instagram” sosial şəbəkəsində istifadəçilərə izləyici sayını artırmasına kömək etmişəm. İttiham aktında qeyd edilən pullar izləyici sayının artırılması ilə bağlı olub”.
Zaur Əliyevin ibtidai istintaqdakı ilə məhkəmədəki ifadəsində ziddiyyətlər olduğu üçün ilkin ifadəsi zalda elan edilib. İfadədə bütün məsələlər etiraf edilib:
“Texnologiya sahəsində ixtisaslaşmışam. Heç bir yerdə işləmədiyimə görə pul qazanmaq məqsədi ilə “Telegram” kanalında qapalı qrup yaratmağı düşündüm. Həmin qrupa pornoqrafik videolar və fotoşəkillər toplayaraq qrupa müraciət edən şəxsləri ödənişlə qrupa daxil etdim. Pornoqrafik video və fotoşəkillərə baxmalarına şərait yaratdım. İlk dəfə “Randomhsfs” adı ilə kanal açdım. Bununla yanaşı “Hunter” və “Qeyretti_fahişələr” qrupu yaratdım. “Qeyretti_fahişələr” qrupu ödənişsiz idi”.
Həmin ifadələrin məzmunundan görünür ki, Zaur Əliyev ibtidai istintaq zamanı törətdiyi cinayət əməlini tam etiraf edib və işin faktiki hallarına uyğun ifadə verib.
Məhkəmədə dindirilən şahid Azər İsrafilov (ad şərtidir) deyib ki, “Telegram” kanalında “Azəri ifşaları” adlı reklama rast gəlib:
“Həmin reklama daxil olanda ödəniş etməli olduğumla bağlı bildiriş aldım. Telefon vasitəsilə kartdan karta 5 manat məbləğində pul göndərdim, pulu göndərdikdən sonra linkə daxil oldum. Həmin linkdə qabağıma uşaq pornoqrafiyası ilə bağlı videolar çıxdı, bunu görən kimi dərhal baxmadan səhifədən çıxdım”.
Digər şahid Elvin Səfərov (ad şərtidir) ifadə verərkən bildirib ki, sosial şəbəkələrin birində qarşısına reklam çıxdı:
“Reklamın şüarı isə “maraqlı, əyləncəli dünyaya daxil ol” idi. Reklama girəndə “Telegram” kanalı açıldı. Kanala qoşulmaq üçün 10 manat ödəniş etməli idim. Pulu ödəyərək qrupa daxil oldum və gördüm ki, pornoqrafik qrupdur. Dərhal çıxdım”.
Beləliklə, məhkəmədə tədqiq edilmiş sübutlara məcmu halda hüquqi qiymət verilərək Zaur Əliyevin uşaq pornoqrafiyasını yayması sübuta yetirilib. Məhkəmədə aparılan istintaq və tərəflərin çıxışları ilə Zaur Əliyev cinayət üzrə təqsirli bilinib.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Zaur Əliyev 5 il müddətinə azadlıqdan məhrum edilib.
Fidan İlqar
