Bakının Binəqədi rayonunda su xətti partlayıb. Bu haqda bu gün, 7 fevral tarixində Bakuplus.az Xəzər Xəbər-ə istinadən məlumat verir.
Söhbət rayonun Gülüstan qəsəbəsindən gedir. Sakinlərin sözlərinə görə, bir neçə gündür ki, boru partlayaraq piyadaların və avtomobillərin gediş-gəlişini çətinləşdirib.
“Ərazidə belə vəziyyət tez-tez yaranır, 5 gündür ki, su axır. Uşaqlar məktəbə getməkdə çətinlik çəkirlər. Dəfələrlə olub ki, bütün yolu su basıb. Buna görə lükləri açıq qoyuruq ki, su oraya axsın”, – deyə sakinlər şikayət edirlər.
“Azərsu” Açıq Səhmdar Cəmiyyətindən bildirilib ki, qurum məsələdən xəbərdardır. Əraziyə qəza briqadası göndərilib və məsələ qısa zamanda həll olunacaq.
