Abşeron qəsəbələrinə yeni nəfəs verən abadlıq işləri geniş müzakirələrə səbəb olub. 2019-cu ildən başlayaraq Bakıətrafı qəsəbələr turistik zonalara çevrilir, burada müxtəlif üslublara uyğun olaraq, gəzməli yerlər yaradılır, tarixi abidələr bərpa olunur.
Hazırda Balaxanı, Ramana, Bibiheybət qəsəbələrində aparılmış yenidənqurma tədbirlərinin əsas mərhələsi yekunlaşıb. Həmçinin Pirşağı, Əmircan qəsəbələrində analoji layihələr həyata keçirilir.
Bakı sakinləri arasında “Abşeron Fransa deyil”, “Bu, bizim tariximizə uyğun gəlmir” deyənlər olsa da, həmin ərazilərdə sakinlər üçün yeni iş yerlərinin yaradılması, yerli və xarici turistlərin cəlb edilməsi faktı şübhəsizdir.
Belə ki, həmin qəsəbələrə məktəbli ekskursiyaları təşkil olunur, xaricilərlə yanaşı, yerli sakinlər də yaşadıqları ərazilərin tarixini öyrənirlər.
Bakuplus.az komandası olaraq, biz həmin qəsəbələri ziyarət etdik, orada gəzməli, görməli yerlərlə maraqlandıq. Tarixi komponentlərlə yanaşı, kafe, emalatxanalar, suvenir mağazaları və fotosessiyalar üçün uyğun olan yerlərin mövcudluğunu da araşdırdıq.
Balaxanı qəsəbəsi
Qəsəbələrin abadlaşdırılması layihəsi 2019-cu ildə məhz Balaxanıdan başlanıb. Qəsəbənin 19-cu və 20-ci əsrlərin əvvəllərində tikilən evlərdən ibarət köhnə hissəsi bərpa olunub. Həmçinin 1635-1636-cı illərdə inşa olunan Şah Səfi karvansarası, 14-cü əsrə aid olan “40 pilləkən” adlı ovdan və “Qum hamamı” kimi tarixi abidələr qorunaraq cəlbedici ziyarət yerlərinə çevrilib.
Qəsəbədə seqvey turu da daxil olmaqla turlar təşkil olunur, kafelər və fastfud piştaxtaları qonaqları qarşılayır. Xüsusilə “Art Cafe” diqqətimizi çəkdi. Orada 100 illik saat, 150 illik xalça, 300 illik kerosin lampası və digər antikvar əşyaları görmək mümkündür. Həmçinin qəsəbədə xalça sexi, keramika sexi, papaqçı, çəkməçi emalatxanaları, suvenir və çiçək mağazaları və daha nələr, nələr fəaliyyət göstərir.
Balaxanıda müxtəlif yarmarkalar və festivallar keçirilir.
[URIS id=102978]
Bibiheybət qəsəbəsi
Bibiheybət Xəzər dənizinin sahilində yerləşən tanınmış məscidi və saysız-hesabsız balıq restoranları ilə məşhur olan qəsəbədir. 2020-ci ildə Balaxanıdan sonra burada da abadlıq işləri aparılıb. Qədim qəsəbəyə rəng qatmaq üçün binalar boyanıb, dalanlara qəmbər daşlar döşənilib, əsrlərlə yaşı olan binaların fasadları yenilənib. Küçə uzunu binaların divarlarına fərqli freska və qraffiti nümunələr çəkilib. Xüsusi arxitektur görünüş qazanmış dalanlar rəngarəng dibçək gülləri ilə bəzədilib.
[URIS id=102990]
Ramana qəsəbəsi
Ramana qəsəbəsi ərazisində əsaslı təmir və abadlıq işləri ötən il yekunlaşıb. Neft mədəninin kənarında yerləşən qəsəbəyə indi yeni həyat verilib. Məşhur “Koroğlu”, “Nəsimi” və “Babək” filmlərinin müəyyən səhnələrinin çəkildiyi XII-XIV əsrlərə aid olan Ramana qalası bərpa olunub.
Qəsəbə ərazisində yerləşən tarixi Novruzqulu hamamında da bərpa işləri görülüb. Hamam indi muzey kimi işləyir.
Balaxanının yenilənməsindən sonra ərazidə dulusçuluq sexləri, suvenir və əl işləri, mürəbbə və quru meyvələr satan mağazalar, milli dekor evi də fəaliyyət göstərir.
[URIS id=103002]
