Bakı sakinlərindən biri “Memar Əcəmi” metrostansiyası yaxınlığında yerləşən “Mone” gözəllik salonundan şikayətçidir.
Bakuplus.az-ın əldə etdiyi məlumata görə, sözügedən salonda xanım müştərinin saçı yandırılıb.
Şikayətçi iddia edir ki, lazeroloq hadisədən sonra üzr belə istəməyib və bunu adi hal kimi qarşılayıb.
“Lazeroloq xanım başımın bir hissəsini yandırdı. Daha sonra məni günahkar görüb, başını tərpətdin dedi. Halbuki mənə suallar verib özü söhbətə tuturdu. Diqqətsiz şəkildə saçımı yandırdı. Mənə deyir ki, xanım, işdir də olub. Məni haqsız görüb, üzr belə istəmədi”.
Müştərinin sözlərinə görə, salonun sahibi də onu günahkar görüb:
“Salonun sahibi də məni günahkar gördü. Saçın yanmayıb, heç nə yoxdur dedi. Sonra özümü müdafiə edən zaman “saçına toz səpmisən, o da şüanı çəkir ona görə yanıb” , “siz problemli adamsınız” kimi sözləri ünvanladı mənə. Ziyan görən də mən, ittiham olunan da mən”.
Məsələni aydınlaşdırmaq üçün “Mone” gözəllik salonu ilə əlaqə saxlamağa çalışdıq. Amma təəssüf ki, zənglərimizə cavab verilmədi.
