Azərbaycan Respublikasının “Hərbi vəzifə və hərbi xidmət haqqında” qanununda təklif olunan dəyişikliklərə əsasən, hərbi xidmətə çağırış yaş həddi 35 yaşdan 30 yaşa endirilir. Əvvəlcə qüvvədə olan qanuna əsasən, çağırışçılar 18 yaşından 35 yaşınadək kişi cinsli Azərbaycan vətəndaşları idi, amma dəyişikliklə bu yaş həddi 30-a endirilir.
Dəyişikliyə əsasən, çağırışçılar ilkin hərbi qeydiyyata alınmış və ya alınmalı olan müddətli həqiqi hərbi xidmət keçməmiş 18 yaşından 30 yaşınadək Azərbaycan Respublikasının kişi cinsli vətəndaşları olacaqlar.
Mövzu ilə bağlı Bakuplus.az-a açıqlama verən hərbi ekspert Ramil Məmmədlinin sözlərinə görə, hərbi xidmətdən keçmə haqqında qanunvericilikdə dəyişiklik edilməsi müzakirə mövzusu idi:
“Artıq bir müddətdir ki, Azərbaycanda müxtəlif strukturlarda, qurumlarda və mediada hərbi xidmətdən keçmə haqqında qanunvericilikdə dəyişiklik edilməsi müzakirə mövzusu idi. Bununla bağlı müxtəlif təkliflər və fikirlər də var idi. Hazırda da var.
Xidmətdə yaş həddinin 35-dən 30-a endiriliməsi də bu müzakirələrdən biri idi. Təbii ki, bu dəyişiklikdə iki istiqamət var. Biri müddətli həqiqi hərbi xidmət hərbi qulluqçularına, digəri isə müddətdən artıq həqiqi hərbi xidmət hərbi qulluqçuları - gizirlər və miçmanlara aiddir”.
R.Məmmədli qeyd edib ki, Azərbaycanda çağırışçıların həqiqi hərbi xidmətə çağırılması ilə bağlı digər dəyişikliklər edilməsi gözləntiləri də var:
“Dəyişikliklər həm xidmət müddəti, həm də yaş həddi ilə bağlı ola bilər”.
Nəzrin Vahid
