Bakıda hemofiliya xəstəsinin üç il səhv müalicə edilməsi ilə bağlı iddia irəli sürülüb.
Bununla bağlı Bakuplus.az-a şikayət ünvanlanıb.
Şikayətçi “Qan Donorları Assosiasiyasının” sədri Fuad Əsgərov Respublika Kliniki Xəstəxanasında (RKX) müalicə və müayinədən imtina etdiyini qeyd edib:
“Respublika Klinik Xəstəxanasında hemofiliya xəstəliyindən əziyyət çəkən şəxslərə qarşı haqsızlıq edilir. Şöbədə peşəkar həkim yoxdur. 2023-cü ilin dekabrında mənim analizimdə faktor dərəcəmin 6,6 olduğunu dedilər. Etiraz edib dedim ki, mənim faktor dərəcəm 6,6 ola bilməz. Dərmanı az-az verdilər. Daha sonra məcbur olub 2024-cü ilin dekabrın 25-də Moskvaya getdim. Moskvada mənim faktor dərəcəmin 1,9 olduğunu dedilər. Üç il məni yanlış müalicə ediblər.
1700 insana səhv diaqnoz qoyulubsa, bu biabırçılıqdır. Həkimlər elə rəftar edir ki, ora sanki ac olduğumuz üçün gedirik. Başa düşmürlər ki, biz müalicə və müayinə üçün gedirik.
Mən irsi qan xəstəliyi olan hemofiliyadan əziyyət çəkən şəxs olaraq Respublika Kliniki Xəstəxanasında müalicədən və müayinədən imtina edirəm. Bu gündən etibarən onların verdiyi mənşəyi bəlli olmayan, düzgün analiz aparılmadan təyin olunan “dərmanlardan” imtina edirəm. Bu addımın sonu ölüm də olsa, mən bu dərmanları düzgün təyinatı olmadan qəbul etməyəcəm. Həyatıma nə isə olsa, RKX direktoru Dr. Elviz və onun gənc kosmetoloq müavini Minə xanımın səbəbindəndir. Özlərinə həyatımız üzərində “krallıq” qurublar. Amma bütün xərc dövlətimin büdcəsindən gedir”.
Məsələ ilə bağlı aidiyyəti qurumlara sorğu ünvanlamışıq.
Nəzrin Vahid
