Abşeron rayonu Hökməli qəsəbəsinin sakinləri iddia edir ki, içməli suya qum qatılıb.
Milli.az-ın xəbərinə görə, sakinlər su filtrlərindən istifadə etsə də, artıq o da kömək olmur.
Məsələ ilə bağlı İri Şəhərlərin Birləşmiş Su Təchizatı Xidmətindən isə aylar öncə müraciət olunan problemlə bağlı verilən cavabın eynisi verildi:
"Əhaliyə verilən içməli su öncə mexaniki təmizləyici üsulla qum süzgəcindən, daha sonra mərhələli şəkildə yeni texnologiyalardan keçirilir. Bütün xətlərdən gələn emal olunan sular Bakı şəhərində yerləşən 23 mərkəzi su anbarları və nasos stansiyalarına ötürülür. Emal olunan su hər bir nöqtədə müəyyən maddələr vasitəsi ilə zərərsizləşdirilir. Daha sonra laboratoriyalarda analizlərdən keçirilir, təhlillər edilir. Bu günə kimi əldə olunan nəticələrdə ciddi kənara çıxma halları müşahidə olmayıb".
Azad İstehlakçılar Birliyinin (AİB) sədri Eyyub Hüseynov bildirib ki, su infrastrukturu o qədər köhnəlib ki, nə qədər təmiz su versək də əhalinin kranlarından bu cür su gələcək: “Çünki tez-tez qəzalar baş verir, kənar texniki sular su mənbələrinə qarışır. Su infrastrukturu bu vəziyyətdə olduğu üçün su nə qədər təmizlənsə də, bu hallar baş verir".
