"Azərbaycan Dövlət İqtisad Universitetinin (UNEC) Dərbənd filialının məzunlarına diplom blanklarının təqdim edilməsi ilə bağlı Elm və Təhsil Nazirliyinə rəsmi məktub ünvanlanıb".
Bunu Bakuplus.az-ın sorğusuna cavab olaraq UNEC-dən bildirilib.
Qeyd olunub ki, məsələnin həlli istiqamətində nazirliklə mütəmadi olaraq əlaqə saxlanılır və qısa müddət ərzində diplom blanklarının universitetə təqdim olunacağı bildirilib.
Xatırladaq ki, filialın 2023-2024-cü tədris ili üzrə məzunları sosial şəbəkədə diplom ala bilmədikləri barədə məlumat yayıblar.
***
11:02
Azərbaycan Dövlət İqtisad Universitetinin (UNEC) Dərbənd filialının 2023-2024-cü tədris ili üzrə məzunları diplom ala bilmirlər.
Bakuplus.az saytına müraciət edən şikayətçinin sözlərinə görə, diplomun verilməməsi ilə bağlı məzunlara konkret səbəb bildirilmir.
“Bizə deyirlər ki, Elm və Təhsil Nazirliyinə müraciət edin. Elm və Təhsil Nazirliyinə müraciət edirik. Onlar da universitetə yönləndirir. Bununla bağlı heç bir tərəf ictimaiyyətə, məzunlara açıqlama vermir”, - deyə şikayətçi bildirib.
Məsələ ilə bağlı Elm və Təhsil Nazirliyinə sorğu ünvanladıq. Qurumdan bildirildi ki, sözügedən məsələ üçün universitetlə əlaqə saxlayın.
