İşədüzəltmə şirkətləri günbəgün çoxalır. Bu şirkətlərin əməkdaşları müxtəlif vədlər verib, müqavilələr imzalayırlar. Təbii ki, bu xidmət ödənişlidir. Bəziləri həm müqavilə zamanı ödəniş alır, həm də işə qəbul olduqda ilk maaşdan müəyyən faiz miqdarında pul tələb edirlər. Təəssüflər olsun ki, bu sahə çox da şəffaf deyil. İşə düzəltmək adı ilə insanlardan pul alıb geri dönüş etməyənlər də var.
İşədüzəltmə şirkətləri nə dərəcədə güvənlidir?
Karyera mütəxəssisi Pərviz Əfəndizadə bizim.media-ya bildirib ki, bu cür şirkətlərə müraciət etməzdən öncə araşdırmaq lazımdır:
“Beynəlxalq təcrübədə də işədüzəltmə şirkətləri var. Azərbaycanda da işədüzəltmə şirkətləri aktiv fəaliyyət göstərirlər. Sadəcə olaraq iş axtaran şəxslər hər hansısa bir şirkətlə əməkdaşlıq etməzdən əvvəl birinci növbədə həmin şirkəti araşdırmalıdır. Sadəcə internetdə şirkət barədə axtarış edib, sosial media hesablarına baxmaq belə kifayətdir”.
İşədüzəltmə şirkəti, yoxsa birbaşa CV göndərmək?
Dələduzluq halları çoxaldığı üçün insanların işədüzəltmə şirkətlərinə güvəni qalmayıb. Mütəxəssis qeyd edir ki, əgər CV-nizi özünüz yaza bilirsinizsə, məlumatlısınızsa, birbaşa CV-ni göndərə bilərsiniz:
“İşədüzəltmə şirkətinə müraciət etməsəniz də olar. Sadəcə vakansiyanın tələblərini diqqətlə oxumaq və CV-nizi, müraciətinizi ona uyğun yazmağa diqqət etməlisiniz”.
