Paytaxt küçələrinin birində azyaşlı uşaq tapılıb. Bu barədə ötən gün, 20 iyun tarixində tanınmış hüquq müdafiəçisi, Azərbaycan Uşaqlar Birliyinin sədri Kəmalə Ağazadə Facebook səhifəsində yazıb.
“1940-cı il təvəllüdlü baba (ehtimal edilir ki, ruhi problemləri var), təxminən 2 yaşlı uşaq (davamlı olaraq yuxulu vəziyyətdə) Nərimanov rayonu ərazisində gecə saatlarında aşkarlanıblar. Uşağın anası narkotik vasitələr aludəçisidir. Kürdəmir rayon sakinidirlər. Baba Kürdəmir məktəblərinin birində direktor vəzifəsində çalışıb. Məlumatı yazmaqda məqsədim ailənin həm də yaxınlarını aşkarlamaqdır”, - Ağazadə öz səhifəsində yazıb.
Ailə, Qadın və Uşaq Problemləri üzrə Dövlət Komitəsinin mətbuat xidmətinin rəhbəri Teymur Mərdanoğlu bildirib ki, məsələ aidiyyəti qurumların nəzarətinə götürülüb.
"Artıq aidiyyəti qurum ailəni axtarır. Onlar tapıldıqdan sonra sağlamlıq vəziyyətləri qiymətləndiriləcək. Əgər onların sağlamlığı yerində olmasa, uşaq anadan alınaraq dövlətin himayəsinə veriləcək", - o, əlavə edib.
Ağazadənin sözlərinə görə, ailə ilə bağlı məlumat əldə etmək üçün komitə rayon İcra Hakimiyyətinə müraciət ünvanlayıb.
Azərbaycan Respublikasının Əmək və Əhalinin Sosial Müdafiəsi Nazirliyi yanında Sosial Xidmətlər Agentliyinin ictimaiyyətlə əlaqələr şöbəsinin müdiri Murad Həşimov bildirib ki, faktla bağlı araşdırma aparılır.
