Qaçqınların və Məcburi Köçkünlərin İşləri üzrə Dövlət Komitəsinin sifarişi ilə Sabunçu rayonunun Ramana, Qaradağ rayonunun Ümid, Binəqədi rayonunun Xocəsən qəsəbələrində, Abşeron, Lənkəran və Samux rayonlarında, Sabunçu rayonunun Kürdəxanı qəsəbəsində tikilmiş çoxmənzilli binalarda, o cümlədən Abşeron rayonunda tikintisi davam etdirilən yaşayış evlərində mənzillərin satışı qaydası təyin olunub. Bu barədə Əmək və Əhalinin Sosial Müdafiəsi Nazirliyindən məlumat verilib.
Bu, Prezident İlham Əliyevin fərmanı ilə təsdiq edilmiş “Azərbaycan Respublikasının Əmək və Əhalinin Sosial Müdafiəsi Nazirliyi tərəfindən mənzillərin satışı və satışdan əldə olunan vəsaitdən istifadə Qaydası”nda öz təsdiqini tapıb.
Satışa çıxarılan mənzillərin dövlət mülkiyyəti daşınmaz əmlakın dövlət reyestrində qeydə alınır. Mənzillərin bazar dəyəri nazirliyin müstəqil qiymətləndiricisi tərəfindən müəyyən edilir. Satış elan edildiyi gündən 1 il ərzində satılmayan mənzillər bu Qaydaya uyğun olaraq yenidən qiymətləndirilməlidir.
Mənzillərin satışı nazirliyin rəsmi internet saytında onlayn və ya hərrac vasitəsilə həyata keçirilir.
