"Qadınlara deyirəm ki, hər şeyə görə ailənizi dağıtmayın. Düzdür, mən də həyatımda bu ayrılığı yaşamışam. Bir var ki, kişi sənə hərtərəfli kömək etsin. Yəni almağından-verməyindən xəbərin yox, gecə ürəyini ovuşdurmursan ki, səhər-səhər qazanım qaynayacaq, yoxsa qaynamayacaq, uşağım görəsən nə yeyəcək, nə yeməyəcək... Bir kişi ki qu deyəndə qu verir, su deyəndə su verir, "şuba"nın, brilyantın birini çıxarıb, digərini geyinirsən... Bir kişi sənin pulunu verirsə qoy, hara gedirsə getsin. O harada getsə, saat 12 olan kimi evinə gələcək".
Olay.az xəbər verir ki, bu sözləri Əməkdar artist Gövhər Rzayeva deyib.
Qarmon ustadı qadınlara kiçik söz-söhbətlərə görə ailələrini dağıtmamağa səsləyib:
"Qadınlar, evinizi niyə dağıdırsınız? Sonra da oturursunuz alimentə... O "şuba"da, qaş-daş da gedir, alimenti bir ay verməyəndə balağını çəkirsən başına ki, pul vermədi. Oturub evində o pulu yeyirsən də... Bu artıq sənin təməlindir. Mən deyirəm ki, ailənizi hər şey üçün dağıtmayın. Bir də var ki, fərsiz kişi... Pisi düzəltmək olmur. O saatlarını həftələrə, həftələri aylara, ayları illərə dəyişməyə dəyməz. İnsanın xasiyyəti heç zaman dəyişmir. Fərsiz kişi ilə bir qadın gününü niyə qara etməlidir? Ayrılsın. Birdə var ki, kişi sənə evdə həyat verib. Hər zaman demişəm ki, kişinin bineyi-qədimdən bəri gözü şor olub. Mən öz qadınlığımla gözəl qadın görəndə ona baxıb, tərif deyirəm. Bəs kişi gözəl qadın görəndə nə etsin? Kişinin pulu evdə olar, özü bayırda. O hər gün evdə olsa sənin ürəyini vuracaq. Deyəcəksən ki, bu nə vaxt çıxıb evdən gedəcək?! Ailəyə daxil oldunsa, sənin məhəbbətin övladlarına keçir. Sevgi evin kandarına kimidir. Evin içinə keçəndən sonra olur "köhnə ölü”.
