Bakuplus.az-ın bugünkü müsahibi kosmetoloq Zümrüd Rəhimovadır.
Müsahibəni təqdim edirik:
- Artıq yaz fəslindəyik. Yazda qadınlarımız üz dərilərinə necə qulluq etməlidirlər? Ümumiyyətlə dəriyə uyğun qulluğun tipini necə müəyyən etmək olar?
- Yazda dəriyə qulluq vacibdir. Dəri daha çox günəşin təsirinə məruz qaldığı üçün SPF tərkibli kremlər, yüngül nəmləndiricilər və antioksidant serumlar tövsiyə olunur.
- Hazırda ən çox tələbat olan kosmetik prosedurlar hansılardır?
- Botoks, dolğu, mezoterapiya, karbon pilinq və dərinin təmizlənməsi - bu proseduralara daha çox tələbat var.
- Ev şəraitində dərinin tipini müəyyən etmək olarmı? Evdə cild baxımını düzgün aparmaq üçün hansı əsas addımları tövsiyə edirsiniz?
- Dəri tipinin evdə müəyyənləşdirilməsi mümkündür. Bunun üçün səhər yuyunduqdan sonra üzə heç nə çəkmədən 2 saat gözləyib, dəriyə toxunaraq yağlı, quru və ya qarışıq olduğunu müəyyən etmək olar.
- Ev şəraitində hansı maskalardan hazırlayıb istifadə etmək olar? Ev şəraitində duzla zeytun yağını və ya şəkər tozu ilə limonu qarışdıraraq üz təmizləyicisi kimi istifadə edirlər, bu doğrudurmu?
- Ev maskalarından bal + yoğurt, yulaf + bal, qara gil maskaları uyğundur. Duz və şəkər ilə edilən skrablar isə çox həssas dəri üçün uyğun deyil.
- Cilddə yaranan ləkələr və piqmentasiyalar üçün ən effektiv müalicə metodları hansılardır? Üzü təmizləmək üçün bəzi xanımlar pilinqlərdən istifadə edirlər. Onlara hansı məsləhəti verərdiniz?
- Ləkə və piqmentasiyaya qarşı retinol, C vitamini, kimyəvi pilinqlər və lazer prosedurları effektivdir. Pilinqləri həftədə 1 dəfədən artıq etməmək məsləhətdir.
- Kosmetologiya ilə bağlı ən çox qarşılaşdığınız səhvlər və pasiyentlərin yanlış düşüncələri hansılardır?
- Evdə özbaşına prosedur etmək, dərisini düzgün tanımamaq və məhsulları dermatoloqa məsləhətləşmədən istifadə etmək olmaz. Kosmetoloji prosedurların nəticəsini dərhal gözləmək və eyni məhsulu hər kəs üçün uyğun hesab etmək də yanlış yanaşmalardır.
- Botoks, dolğu prosedurlarını hansı yaşlarda və hansı vəziyyətlərdə tövsiyə edirsiniz?
- Mimiki qırışlar 25-30 yaşdan sonra başlayırsa, botoks edilə bilər. Dolğu isə dərin qırışlar və ya həcim itkisi olduqda tətbiq olunur.
- Hamiləlik dövründə kosmetoloq yanına getmək olarmı?
- Hamiləlikdə bəzi prosedurlar (masaj, təmizləmə) icazəlidir, amma kimyəvi pilinq, botoks və lazer qadağandır.
- Müştərilər daha çox hansı prosedurlar üçün müraciət edir?
- Yaş qruplarına görə prosedurlar dəyişir. Gənclər təmizləmə və sızanaq müalicəsinə, orta yaşlılar anti-aqinq prosedurlarına, yaşlılar isə liftinq və dolğulara üstünlük verirlər.
- Kosmetologiya sahəsində az tanınan prosedurlar hansılardır?
- Az tanınan prosedurlar – plazmaterapiya, bio-revitalizasiya, mikronidlinqdir.
- Hansı estetik prosedurlar kişilər arasında daha populyardır?
- Üz təmizlənməsi, saç tökülməsi əleyhinə mezoterapiya, botoks (alın və göz ətrafı üçün) kişilər üçün populyar prosedurlar arasındadır.
- Dərini nəmli saxlamaq üçün nə etmək lazımdır? Nəmləndirici vasitələrdən necə istifadə etmək olar?
- Gün ərzində 2 litr su içmək, yüngül nəmləndirici və qurutmayan təmizləyicilərdən istifadə etmək dərini nəmləndirir.
- Yaşlanmaya xas olan qırışların qarşısını almaq üçün nə etmək lazımdır?
- SPF-dən istifadə, mimiki hərəkətləri azaltmaq, antioksidantlı məhsullar və botoks ilə qırışların qarşısını almaq olar.
- Maskalarla qırışların qarşısını qismən almaq olarmı?
- Maskaların dərin qırışlara tam təsiri yoxdur, lakin nəmləndirmə və elastiklik baxımından faydalıdır.
- Bəzi qadınlar gecə makiyajı təmizləmədən yatırlar, bunun dəriyə hansı zərərləri var?
- Dəri nəfəs ala bilmir, məsamələr tıxanır, sızanaq və erkən yaşlanma riski artır.
- Biz əsasən qadınlardan danışırıq, bəs kişilər necə, nəyə diqqət etməlidirlər?
- Üz təmizliyi, nəmləndirmə və günəşdən qoruyucu vasitələr kişilər üçün də vacibdir.
Nəzrin Vahid
