Biləcəri qəsəbəsi, “Lokomotiv deposu” adlanan ərazidə keçmiş məcburi köçkünlər məskunlaşıblar. Hazırda kifayət qədər çox ailə dəmiryolu relslərinin yanında özünə ev qurub, yaşamağa çalışır. Lakin onlar həyatlarının təhlükədə olduğunu deyirlər. Bu haqda bu gün, 2 mart tarixində Bakuplus.az Real TV-yə istinadən məlumat verir.
Hər an çökmək üzrə olan bu binada 1994-cü ildən 9 ailə məskunlaşıb. Keçmişdə müəssisə kimi istismar olunan bu binada nə su var, nə də qaz. Buna görə də sakinlər sanitar qovşaqları və hamamlarını yolun qarşı tərəfində tikməli olublar. Bu da o deməkdir ki, gündəlik ehtiyaclarını ödəmək üçün hər bir sakin gün ərzində bir neçə dəfə dəmir yolunu keçməli olur. Bu yolu keçərkən qonşusunu qatar vurduğunu, daha sonra öldüyünü bildirən Afət Məmmədova xüsusilə yaşlı və uşaqların həyatının təhlükədə olduğunu deyir.
Bina nəm divarları, ovulub tökülən tavanı, deformasiyaya uğramış pilləkənləri, hər an qırılmaq təhlükəsi olan eyvanı ilə ayaqda durmağa çalışır. Lakin sakinlər bu qorxu ilə yaşamaqdan bezara gəliblər.
Bir müddət öncə sakinin 3 yaşlı qızı binanın eyvanından yıxılaraq vəfat edib.
Qəzalı binada yaşamağa məcbur qalan sakinlərin problemi ilə bağlı Qaçqınların və Məcburi Köçkünlərin İşləri üzrə Dövlət Komitəsinin mətbuat katibi İbrahim Mirzəyev bildirib ki, ailələrin üz-üzə qaldığı vəziyyətdən xəbərdardırlar: “Dövlət Komitəsinin mənzil fondunda boş yaşayış sahələri yoxdur. Onlar üçün mənzillər bundan sonra yalnız işğaldan azad edilmiş ərazilərdə tikiləcək. Məcburi köçkünlərin öz daimi yaşayış yerlərinə mərhələli qaydada qayıdışı zamanı ilk növbədə ən ağır vəziyyətdə yaşayanlar yaşayış sahələri ilə təmin olunacaqlar”.
