Sabunçu rayon sakinləri uzun illərdir ki içməli su problemi yaşayırlar. Bu haqda 6 avqust tarixində Bakuplus.az Realtv-yə istinadən xəbər verir.
Maştağa qəsəbəsi, Nizami küçəsi döngə 6-da 25 ailə yaşayır və onların problemi içməli suyun olmamasıdır. Qış aylarında heç bir çətinlik yaşamayan sakinlər may ayından etibarən su baxımından çətinlik çəkirlər.
Şikayətçilər bildirilər ki, su problemi illərdir davam edir. Qəsəbənin 4 bir tərəfi su ilə təmin olunub, lakin bu döngə diqqətdən kənarda qalıb. Aidiyyəti qurumlara müraciət etdikdə isə bu ünvanda da su təchizatının artıq aparıldığı, hətta yeni boruların çəkildiyi də deyilir. Lakin faktiki olaraq ərazidəki borular köhnədir.
“Azərsu” ASC faktla bağlı bildirir ki, Sabunçu rayonu, Maştağa qəsəbəsi, Nizami küçəsi döngə 6 ünvanında qurumun mərkəzləşdirilmiş su şəbəkəsi mövcud deyil. Həmin ərazidə uzun illər öncə vətəndaşlar tərəfindən primitiv qaydada metal borularla çəkilən su xətlərindən istifadə olunur. Həmin xətlər isə istismar tələblərinə cavab vermir. Bu səbəbdən xüsusilə yay aylarında suyun təzyiqi ilə bağlı problemlər müşahidə olunur.
Həmçinin qurum əlavə edib ki, Maştağa qəsəbəsinin içməli su şəbəkəsinin yenidən qurulması layihəsi mərhələli şəkildə icra olunur. Layihənin davamı olaraq gələcəkdə həmin ərazidə mərkəzləşdirilmiş su təchizatı şəbəkəsinin yaradılması nəzərdə tutulur.
