Xəbər verildiyi kimi Milli Məclisin noyabrın 25-də keçirilən plenar iclasında məktəbəqədər hazırlığa cəlb edilən uşaqlara yemək verilməsi təklif olunub.
Xatırladaq ki, bir müddət əvvəl bununla bağlı açıqlama verən sabiq təhsil naziri Misir Mərdanov da məktəblərdə şagirdlərə yemək verilməsini təklif etmişdi.
Bəs bu təklif reallaşa bilər?
Təhsil eksperti Elmin Nurizadə Bizim.media-ya açıqlamasında yeməklərlə bağlı diqqət edilməli məqamları qeyd edib:
“Məktəbəqədər siniflərə yemək verilməsiylə bağlı addım atılsa, biz bunu yalnız alqışlaya bilərik. Amma burada kifayət qədər ciddi və nəzərə alınmalı məsələlər var. İlk olaraq yemək dedikdə sağlam, yoxsa hazır bişmiş qidalar nəzərdə tutulur?
Çünki bir çox inkişaf etmiş ölkədə aşağı siniflərdə oxuyan şagirdlər dövlət tərəfindən yeməklə təmin edilir. Bu ölkələrdə şagirdlərin fiziki, zehni inkişafına müsbət təsir etməsi üçün ciddi seçilmiş menyu hazırlanır. Məsələn, burada təzə meyvələr, təzə göyərtilər, süd və digər təbii məhsullar olur. Amma bişmiş, isti, ət yeməkləri kimi yeməklər həm arzu olunmur, həm də qadağandır.
Bildiyimiz kimi, bilinçiklərin, cipslərin, krekerlərin, energetik içkilərin, “fast food” məhsullarının məktəb bufetlərində satılması qadağandır. Bizdə də belə addım atılacaqsa, sırf sağlam qidalanmaya üstünlük verilməlidir”.
Ekspert belə bir addımın təkcə məktəbəqədər təhsilə yox, elə bütünlüklə ibtidai təhsilə də aid edilməsini vurğulayıb:
“Təbii ki, bunun üçün müəyyən büdcə lazımdır. Çünki ibtidai siniflərdə oxuyanların sayı heç də az deyil. Ancaq qeyd olunduğu kimi pilot formada aparıla bilər. Məsələn, birinci il sırf məktəbəqədər hazırlıq qruplarında, növbəti il isə ibtidai siniflərə aid oluna bilər. Dünya praktikasına əsaslansaq, yeməklərin seçilməsi zamanı şagirdin fikri nəzərə alına və ya məktəb həkiminin, mütəxəssisin hazırladığı gündəlik menyu da ola bilər”.
