Bu gün səhər saatlarında Abşeron rayonu Masazır kəndinin ərazisində KATV provayderinin xidmətlərindən istifadə edən sakinlər İnternetsiz qalıb.
Bakuplus.az-a müraciət edən şikayətçilər bildiriblər ki, bu, son zamanlar mütəmadi təkrarlanan hadisəyə çevrilib.
“Hər ayın 1-də növbəti ay üçün abunə haqqını ödəməliyik. Bu əməliyyat bir qədər yubansa, ən uzağı səhər saat 10-da internet kəsilir. Di gəl ki, KATV-ni intizama dəvət etmək üçün bizim əlimizdə heç bir təsir mexanizmi yoxdur. İndi də səhərdən internetsiz qalmışıq. “127” əlaqə nömrəsinə dərdimizi deyirik, həmişə eşitdiyimiz cavabı verirlər – “problem ümumidir, bütün Masazırda internet yoxdur”. Yaxşı, indi biz bununla təskinlik tapmalıyıq”, - şikayətdə deyilir.
