Bakı şəhəri, Yasamal rayonu, Alatava ərazisində söküntü işləri aparan tikinti şirkətinin iş icraçısı və ekskavator sürücüsü saxlanılıb.
DİN-in Mətbuat xidmətindən Bakuplus.az-a verilən məlumata görə, fakta görə Cinayət Məcəlləsinin müvafiq maddəsilə cinayət işi açılıb.
Araşdırma aparılır.
***
15:11
Bakı şəhəri, Yasamal rayonu, Alatava ərazisində aparılan söküntü işləri ilə əlaqədar 27 mart 2025-ci il tarixində Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi tərəfindən əraziyə baxış keçirilib və bu işlərin müvafiq icazə olmadan aparıldığı müəyyən edilib.
Bu barədə Bakuplus.az-a Dövlət Şəhərsalma və Arxitektura Komitəsindən məlumat verilib.
Bildirilib ki, aparılan işlər vətəndaşlarla tam razılıq əldə edilmədən və mövcud qanunvericiliyin tələblərinə zidd aparıldığı üçün Baş İdarə tərəfindən aidiyyəti qurumlarla birlikdə dayandırılıb və aktlaşdırılıb.
"Qanunsuz işlər zamanı vətəndaşların mülklərinə dəymiş ziyanla bağlı müvafiq araşdırma aparılması üçün materiallar Baş İdarə tərəfindən hüquq-mühafizə orqanlarına təqdim ediləcək", - deyə məlumatda qeyd edilib.
***
13:27
“Melissa Park” şirkəti tərəfindən özbaşınalıq edildiyi iddia olunur.
Bu barədə Bakuplus.az-ın redaksiyasına Yasamal rayonu, Alatava 1, Abdulvahab Salamzadə küçəsi, ev 118B ünvanında yaşayan sakinlərdən şikayət daxil olub.
Bildirilir ki, Bakının Yasamal rayonunda yaşayış olan mənzillər “Melissa Park” tərəfindən sökülür:
“Acınacaqlı vəziyyətdəyik. Mənzillərdə insanlar ola-ola evləri sökürlər. Heç bir kompensasiya ödənilməyib. Bununla bağlı hər hansısa bir məlumat da əvvəlcədən bizə verilməyib. Çıxılmaz vəziyyətdə qalmışıq”.
Bakuplus.az qarşı tərəfin mövqeyini öyrənməyə çalışsa da, zənglər cavabsız qaldı. Məsələ ilə bağlı “Melissa Park”ın mövqeyini işıqlandırmağa hazırıq.
Nəzrin Vahid
