Xəbər verdiyimiz kimi, “Əhmədli” metrosunun çıxışına yeni köşkün yerləşdirilməsi nəticəsində piyadaların yolu zəbt edilib.
Məsələ ilə bağlı Xətai Rayon İcra Hakimiyyətinin ictimai-siyasi və humanitar məsələlər şöbəsinin müdiri Pənah İmanovla əlaqə saxladıq.
Pənah İmanov Bakuplus.az-a açıqlamasında bildirdi ki, məsələdən xəbərdardırlar:
“Bir neçə müddət əvvəl həmin ərazidə dəhşətli vəziyyət var idi. Ora insanların intensiv gediş-gəliş yerləri idi. İnsanlar tərəfindən çox narazılıq, şikayət daxil olurdu. Kim nə istəyir, metronun çıxışına gətirib qoymuşdu. Buna görə də rayonun digər əraziləri kimi oranı da təmizlədik, yaxşı vəziyyətə gətirdik. Qanuni obyektlərə, o cümlədən şəhid və qazı ailələrinə sahibkarlıq fəaliyyətlərini davam etdirmək üçün özlərinin razılığı ilə digər ərazilər təklif edildi. Ancaq təbii ki, razılaşmayanlar da oldu”.
Pənah İmanovun sözlərinə görə, təklif olunan yerlər də “Əhmədli” metrostansiyasına yaxın ərazilərdir.
“Çalışırıq ki, həm estetik görkəm normal yerində olsun, həm də qarşı tərəfə problem yaranmasın. Bunun üçün bəzən sahibkara deyirik ki, dükanın, obyektin var. Ancaq eybəcər formadadır. Müraciət edirik ki, səliqəyə salsın. Bəzən elə olur ki, özümüz kömək edirik” – deyə əlavə edib.
***
13:03
“Əhmədli” metrosunun çıxışına yeni köşkün yerləşdirilməsi nəticəsində piyadaların yolu zəbt edilib.
Bakuplus.az xəbər verir ki, bununla bağlı sakinlər sosial şəbəkələrdə narazılıqlarını bildirib.
Sözügedən ərazidə insan sıxlığı çox olduğu üçün hərəkət etmək çətindir. Yeni köşkün bura yerləşdirilməsi isə insanların gediş-gəlişinə daha çox maneə yaradır.
“Metronun üstündə bir qarış yer qalmayıb. Metronun çıxışına köşkü qoyublar. Hələ deyirlər 3-nü də qoyacaqlar. Bəs camaat necə hərəkət etsin?” – deyə sakinlərdən biri bildirib.
