Ləğv olunan Milli Təhlükəsizlik Nazirliyinin (MTN) keçmiş rəisi Akif Çovdarov hərbi təqaüdlə bağlı məhkəməyə müraciət edib. Müraciətə Bakı İnzibati Məhkəməsində baxılıb. Bu haqda bu gün, 16 iyun tarixində Bakuplus.az Qafqazinfo-ya istinadən məlumat verir.
Akif Çovdarov bildirib ki, onun 47 il iş stajı var, o cümlədən 11 il ərzində o, MTN-in idarə rəisi olub. O, məhkəmədə onu da bildirib ki, 2012-ci ildən həbs olunduğu günə qədər general-mayor rütbəsi ilə xidmət edib.
Məhkəmə iddianı təmin etməyib. Məlum olub ki, Akif Çovdarov məhkəmənin təqdimatı əsasında Azərbaycan Prezidentinin Sərəncamı ilə 2020-ci ildə general rütbəsindən və digər orden və medallarından məhrum edilib.
Məhkəmə qərarında bildirilir ki, iddiaçı Akif Çovdarov qanunun tələblərinə uyğun olaraq general-mayor ali hərbi rütbəsindən əsgər rütbəsinə kimi salındığına görə onun hərbçi kimi pensiya almaq hüququ yoxdur.
Akif Çovdarov qərarla razılaşmayaraq apellyasiya şikayəti verib. Bu günlərdə Bakı Apellyasiya Məhkəməsi şikayəti əsassız sayaraq təmin etməyib.
Akif Çovdarov 2017-ci ildə Bakı Hərbi Məhkəməsinin hökmü ilə 12 il müddətinə azadlıqdan məhrum edilib. O, 2020-ci ildə imzalanan amnistiya fərmanı ilə azadlığa buraxılıb.
2022-ci ilin dekabrında Bakı Apellyasiya Məhkəməsi Akif Çovdarovun qohumlarına məxsus 30 milyon dollarlıq əmlakın azad edilərək sahiblərinə qaytarılması barədə qərar çıxarıb. Bir müddət əvvəl Ali Məhkəmə bu qərarı ləğv edib.
