Daxili İşlər Nazirliyinin Nəqliyyatı İntellektual İdarəetmə Mərkəzi (NİİM) piyadalara yol verməyən sürücülərə müraciət edib. Bu haqda bu gün, 16 iyun tarixində Bakuplus.az məlumat verir.
NİİM-dən daxil olan məlumata görə, əsasən, Yasamal, Nəsimi, Nərimanov, Nizami, Xətai və Səbail rayonlarının küçə və prospektlərində bəzi sürücülər nizamlanmayan piyada keçidlərindən istifadə etməyə çalışan piyadalara yol vermirlər.
Həmçinin qeyd olunur ki, bəzi sürücülər kamera quraşdırılan yollarda piyadalara yol verir, kamera olmayan yerlərdə isə yol vermirlər.
Daxili İşlər Nazirliyinin Nəqliyyatı İntellektual İdarəetmə Mərkəzi sürücüləri yol hərəkəti qaydalarına əməl etməyə çağırır və qeyd edir ki, piyadaların keçidlərindən piyadaların keçməsinə icazə verilməsi baş verə biləcək qəzaların qarşısının alınmasına və yol qəzalarının azalmasına kömək edir.
İnzibati Xətalar Məcəlləsinin 330-cu maddəsinə əsasən, piyadanın nizamlanmayan piyada keçidinə buraxılmamasına görə 50 manat məbləğində cərimə tətbiq edilir.
