Paytaxtın Nəsimi rayonunda sakinlər susuz qalıblar. Bu haqda BakuPlus.az Oxu.az-a istinadən bu gün, 20 aprel tarixində xəbər verir.
Rayon ərazisində yaşayan sakinlərə suyun düzgün qrafiklə verilməməsi narazılıq yaradır. Asif Məhərrəmov küçəsi 37 ünvanında hər gün gecə saat 00:00-da suyu kəsirlər.
“Bu binada xəstəsi, körpəsi olanlar var, üstəlik orucluq ayıdır, camaat sahura durur, baxır ki, su yoxdur. Hər gün “Azərsu” ASC-nin qaynar xəttinə zəng edirik. Gecə saat 2-də, 5-də belə deyirlər ki, qəza yoxdur. Hər dəfə “şikayətiniz nəzərə alındı” deyirlər, lakin dəyişən heç nə yoxdur. Əksinə, gündüzlər də “təmir işləri gedir” deyib, yalandan suyu kəsirlər. Biz kimə müraciət edək? Gecə saat 00:00-dan səhər saat 06:00-a qədər su problemi yaşayırıq”, - deyə sakinlərdən biri deyib.
“Azərsu” ASC-nin mətbuat xidməti açıqlamasında bildirib ki, bəzi ərazilərdə gecə saat 00:00-dan səhər saat 06:00-a qədər mərkəzi anbarların çıxış xəttinə verilən suyun həcmi azaldılır, suyun verilişi tamamilə kəsilmir, sadəcə olaraq gecə saatlarında anbar ehtiyatlarının toplanması üçün verilən suyun miqdarı azaldılır.
Səbəb kimi isə anbar ehtiyatlarının toplanaraq paylayıcı şəbəkədə artıq təzyiq yarada bilməsi, bunun da qəzaya səbəb ola biləcəyi göstərilib.
