“Miss Azerbaijan - 2019” Səmra Hüseynova həmkarı Mariya Kovalçuk adlı modelin Dubayda yolun kənarında ağır xəsarətlərlə tapılması hadisəsinə münasibət bildirib.
Bakuplus.az xəbər verir ki, o, bu barədə rəsmi “Instagram” hesabında paylaşım edib.
Səmranın sözlərinə görə, M.Kovalçuk kimi o da 4 il əvvəl Bakıda bu partilərə qoşulmaq üçün təklif alıb:
“Ukraynalı modelə Dubayda zorakılıq edildikdən sonra iflic olub. Təsəvvür etmək istəmirəm neçə nəfər edib. 4 il əvvəl həmin bu partiləri təşkil edən Solomo adlı şəxs Dubaydan Bakıya gəldi, mənimlə iş görüşü etdi, dedilər səni seçmişik, sən artıq bir marka simasısan. Məni apardı “Sabah Residence”ə, “Port Baku”ya ki, ev götürsülər. Mən də qaraçı yapışmışdım ki, yox, kukla teatrına getmək istəyirəm. Gəldi anamla tanış oldu ki, narahat olmayın, gününə 4-5 min dollar qazandı, 2-3 aya 10-50 min dollar alacaq, həm partilərdə olacaq, həm də çəkiliş. Anam yaxasına yapışdı ki, mənə də bilet alırsız, qızımla bir evdə qalacam. Dedilər ki, yox, tək gəlməlidir, baxça deyil. 7 il əvvəl həmin şəxs mənə model agentliyi adından zəng vurmuşdu. Keçmiş rəfiqəm onunla danışdı və mənə dedi ki, “Yox, getmə”. Ürəyimdə dedim, görəsən o, bunlarla nə danışdı ki, bunlar mənə geri zəng etmədilər”.
Model bildirib ki, anası onu seçim arasında qoyub və daha sonra fikrindən daşınıb:
“Anam qoymadı, özümü çırpdım yerə, vurdum divara, anam dedi “Ya mən, ya Dubay”. Təbii ki, bir neçə dövlət xidmətində çalışan insanlarla gedib maraqlandım, onlar da dedilər “sənlik deyil”. İndi isə bu hadisə… Çox incidim, parçalandım. İnsan tikan üstə olanda, borc-xərc içində üzəndə, xəyalən düşünür ki, möcüzə baş verdi. Möcüzələr isə olmur…”.
Qeyd edək ki, bir neçə gün əvvəl ukraynalı model Mariya Kovalçuk Dubayda təcavüzə uğrayaraq yolun kənarında tapılıb. Məlumata görə, onun ayaqları, qolları və onurğası sınıb. Anasının və rəfiqəsinin sözlərinə görə, bir gün əvvəl M. Kovalçuk naməlum şəxsləri görmək üçün otelə tək gedib. Bundan sonra isə ondan xəbər alına bilməyib.
