Bakıda “Teknofest Azərbaycan” beynəlxalq Aviasiya, Kosmos və Texnologiya festivalı başa çatıb. Dörd gün ərzində, mayın 26-dan 29-na qədər festivalda Türkiyə və Azərbaycan şirkətlərinin beynəlxalq sərgiləri, əyləncə proqramları, hava şouları və bir sıra digər tədbirlər təşkil olunub. Bu haqda bu gün, 30 may tarixində Bakuplus.az məlumat verir.
Tədbir Azərbaycan Respublikasının Rəqəmsal İnkişaf və Nəqliyyat Nazirliyinin təşkilatçılığı ilə təşkil olunub.
Festival çərçivəsində Azərbaycan və Türkiyə hərbi pilotları qırıcılarda birgə nümunəvi uçuşlar, Hərbi Dəniz Qüvvələrinin Xüsusi Təyinatlı Qüvvələri isə qayıqlarda maraqlı manevrlər həyata keçiriblər. Festival çərçivəsində Müdafiə Nazirliyi üçün ayrılmış pavilyonda müasir hərbi-texniki avadanlıqların təqdimatı olub.
Mayın 28-də Azərbaycan Respublikasının Prezidenti İlham Əliyev və Türkiyə Cümhurriyətinin Prezidenti Rəcəb Tayyib Ərdoğan Bakıda ilk dəfə olaraq keçirilən “Teknofest Azərbaycan” Aerokosmik və texnologiya festivalında iştirak ediblər.
“Teknofest”-in dördüncü günündə Smart Qarabag Hackaton və Baku Open Cyber Cup yarışlarının, Esports Europe Championship-2022 (European Esports Championship-2022), Agro Tech (kənd təsərrüfatı texnologiyaları) yarışlarının iştirakçıları və komandalarının mükafatlandırma mərasimi keçirilib. Həmçinin yarışlarda pilotsuz uçuş aparatları və “yaşıl” texnologiyalar, Baku Skills, Planer, sosial yönümlü texnologiyaları təmsil edən iştirakçıların mükafatladırması baş tutub. Onlara pul mükafatları və qiymətli hədiyyələr verilib.
“Teknofest” tədbiri 2018-ci ildən etibarən hər il Türkiyənin Sənaye və Texnologiya Nazirliyi və Baykar Makina şirkətinin texniki direktoru tərəfindən idarə olunan Türk Texnologiya Komandası Vəqfinin (T3) birgə təşkilatçılığı, Türkiyənin 60-dan çox dövlət qurumu ilə birgə keçirilir. Məqsəd aviasiya, kosmik sənaye və rəqəmsal iqtisadiyyat kimi sahələrin populyarlaşdırılması, bu sahələrdə sahibkarlığın təşviqi, festival çərçivəsində təşkil olunan müsabiqələr vasitəsilə gənc mühəndislərin bilik və bacarıqlarının üzə çıxarılması və milli texnologiyaların geniş ictimaiyyətə təqdim edilməsidir.
[URIS id=46389]
