Sürücülər nəqliyyat vasitələrini saxlamaq üçün yer tapa bilməmələrindən şikayət edirlər. Onların fikrincə, bu problemin həlli üçün çoxmərtəbəli avtodayanacaqların sayı artırılmalıdır. Bu haqda bu gün, 20 iyun tarixində Bakuplus.az Baku TV-yə istinadən məlumat verir.
Bakıda fəaliyyat göstərən çoxmərtəbəli avtodayanacaqda 1 saatadək parklanmanın qiyməti 1 manat, 3 saatadək - 2 manat, 8 saatadək - 3 manat, 12 saatadək - 5 manat, 24 saatadək - 10 manat təşkil edir. Obyekt nəzarətçisinin sözlərinə görə, nəqliyyat vasitəsini saxlamaq üçün müraciət edənlər çox olduğundan avtodayanacaq tələbatı ödəmir.
Şəhərin müxtəlif yerlərində belə parklanma yerlərinin salınmasına ehtiyac var. Ekspertlər hesab edirlər ki, çoxmərtəbəli avtodayanacaqların sayı artırılmalıdır.
“Parklanma probleminin həlli üçün ilk növbədə bütün yaşayış və qeyri-yaşayış obyektlərinin parklanma yerlərinin olması zəruridir. Çoxmərtəbəli parklanma yerlərinin tikilməsi ilə bağlı konkret işlər həm şəhərin mərkəzində, həm də şəhərdən kənarda görülməlidir”, - nəqliyyat üzrə ekspert Eldəniz Cəfərov deyib.
Azərbaycan Respublikası Dövlət Şəhərsalma və Arxitektura Komitəsinin mətbuat katibi Ramiz İdrisoğlu bildirib ki, baş planın işlənməsi zamanı nəqliyyat infrastrukturunun küçə yol şəbəkəsinin inkişaf sxemi hazırlanır, əsas infrastruktur obyektlərinin harada yerləşəcəyi müəyyən edilir. Parklanma yerləri və digər bu növ kiçik obyektlər isə layihələndirmənin növbəti mərhələlərində detallı planlaşdırılan ərazilərdəki tələbatlara və imkanlara uyğun yerləşdirilir.
