Bakının “20 Yanvar” və 3-cü mikrorayon dairələrində, eləcə də “Şamaxinka” adlanan ərazilərdə qeyri-qanuni daşınma xidmətləri təşkil edən sürücülərə son xəbərdarlıq edilib. Bu haqda bu gün, 10 iyun tarixində Bakuplus.az Avtosfer-ə istinadən məlumat verir.
Bakı şəhər Dövlət Yol Polisi İdarəsinin baş inspektoru Araz Əsgərli bildirib ki, Bakı Beynəlxalq Avtovağzal Kompleksinin ərazisində taksi sürücüləri üçün lazimi şərait yaradılıb. Buna baxmayaraq, sürücülər yenə də hərəkət hissələrində sıxlıq və tıxac yaratmağa davam edirlər.
Yol polisi Azərbaycan Yerüstü Nəqliyyat Agentliyi ilə birgə tədbirlər nəticəsində həmin sürücüləri Avtovağzal ərazisinə yönləndirəcək.
Araz Əsgərlinin sözlərinə görə, “Avtovağzal” stansiyası yaxınlığında nəqliyyat qovşağı təşkil edilir: “Kim istəsə, avtobusla, metro ilə rahat hərəkət edəcək. Taksilər də öz yerində. “20 Yanvar” dairəsi və ətraf ərazilərdə xaosa son qoyulacaq. Çünki avtovağzal ərazisində sürücülərə hər cür şərait yaradılıb. İndiyədək deyirdilər ki, bizə yer verin. Bu da onlar üçün yer. Buyurub, gəlsinlər”.
[caption id="attachment_103105" align="alignnone" width="640"]
Foto Avtosfer[/caption]
