“Telegram” sosial şəbəkəsində pornoqrafik səhifə yaradan Bakı Dövlət Universitetinin tələbəsi cəzalandırılıb. Bu haqda bu gün, 14 iyun tarixində Bakuplus.az Qafqazinfo-ya istinadən məlumat verir.
Pornoqrafik səhifə yaradan və səhifəsinə reklam yerləşdirərək gəlir əldə edən Ağcabədi rayon sakini olan 21 yaşlı gəncə cinayət işi açılıb. O, “Pornoqrafik materialları və ya əşyaları qanunsuz yayma” maddəsi ilə məsuliyyətə cəlb edilib.
Nəsimi Rayon Məhkəməsinin qərarı ilə o, 2000 manat məbləğində cərimə cəzasına məhkum edilib.
İstintaq zamanı məlum olub ki, gənc sosial şəbəkələrdən topladığı və əsasən, azrabaycanlılara məxsus olduğu bildirilən pornoqrafik görüntüləri 2022-ci ilin avqustundan etibarən teleqramda yaratdığı “****18+” səhifəsində yerləşdirərək izləyici toplamağa başlayıb. Səhifə 27.000 izləyici topladıqdan sonra o, xarici mərc oyunları saytının reklamını yerləşdirərək 300 manat gəlir əldə edib.
Vəsaiti əldə etmək üçün o, tələbə yoldaşı olan qızın bank kartından istifadə edib.
