"Baker Tilly International" iqtisadçı Fərhad Pərvizini şirkətin Azərbaycan filialında ("Baker Tilly Azerbaijan") tutduğu Maliyyə və biznes məsləhət xidmətləri üzrə direktor vəzifəsindən azad edib.
Bu barədə məlumatı jurnalist Tunay Əliyeva şəxsi sosial media hesabında yazıb.
Onun sözlərinə görə, bu qərar təkcə korporativ məsuliyyət deyil, həm də cəmiyyətin sağlam gələcəyi üçün atılmış cəsarətli və prinsipial mövqedir.
Tunay Əliyeva şirkətin rəhbəri Francesca Lagerberg başda olmaqla bütün komanda üzvlərinə təşəkkür edib. O, bu mövqenin minlərlə qadın üçün önəmli mesaj olduğunu vurğulayıb.
Məsələ ilə bağlı bakupost.az "Baker Tilly International" şirkəti ilə əlaqə saxlayıb. Şirkətin marketinq şöbəsinin əməkdaşı açıqlamasında bildirib ki, şirkət daxilindəki prosedurların paylaşılmamasına məsul olduqları üçün bu barədə məlumat verə bilməzlər:
"Özünüz görürsünüz ki son zamanlar sosial şəbəkələrdə nələr baş verir. Şirkət tərəfindən verilən hər hansı bir məlumat təhrif olunmuş şəkildə paylaşıla bilər deyə biz daxili siyasətimizə əsaslanaraq paylaşmamağa qərara gəldik. Bu müddət ərzində sizdən əlavə şirkətə çox sayda zənglər və sorğular gəlib. Biz qərara gəlmişik ki, heç bir zəngə, heç bir müraciətə cavab verməyək".
Məsələyə aydınlıq gətirmək üçün Fərhad Pərvizi ilə də əlaqə saxlanılıb. O, açıqlamasında bildirib ki, sözügedən məsələ ilə bağlı şirkətin rəhbərliyi ilə əlaqə saxlanılmalıdır:
"Bu barədə şirkət rəhbərliyi sizə məlumat verəcək."
Fərhad Pərvizi ilə söhbət zamanı şirkətlə artıq əlaqə saxlanıldığını bildirdikdə isə o, belə cavab verib:
"Yəqin ki, bunun bir səbəbi var, ona görə də məlumat verilmir. Mən də bu məsələ ilə bağlı müqavilə şərtlərimə əsasən, şirkətin xəbəri olmadan açıqlama verə bilmərəm".
Bununla belə Fərhad Pərvizi sosial şəbəkə hesabındakı iş məlumatlarında "Baker Tilly International"dakı işindən ayrıldığını təsdiqləyib.
Qeyd edək ki, bir müddət əvvəl bir qrup feminist qadın "Baker Tilly International"ın rəhbərliyinə müraciət edərək, şirkətin Azərbaycan nümayəndəliyində çalışan Fərhad Pərvizinin Mədəniyyət TV-də qadınlara qarşı səsləndirdiyi ifadələrə görə ciddi ölçü götürülməsini tələb etmişdi. Onlar Fərhad Pərvizinin bu fikirlərinin artıq şəxsi yox, şirkətin nüfuzuna xələl gətirən mövqe olduğunu qeyd etmişdilər.
