Son günlər “TikTok”da əyləncə yarışları təşkil edən şəxslər saxlanılıblar. Onların əxlaqsızlığı birmənalı şəkildə təbliğ etmələri narazılığa səbəb olub.
Saxlanılan tiktokerlər arasında özünü şair kimi təqdim edən İlhamə Elşadqızı da var. O, bir müddət öncə efirlərin birində ekspert qismində çıxış edib. Bu da insanlar arasında narazılığa səbəb olub.
Bəs görəsən, ekspertlər kimlər olmalıdır? Hər adam ekspert ola bilərmi?
Mövzu ilə bağlı Bakuplus.az-a açıqlama verən Əməkdar jurnalist və publisist, professor Qulu Məhərrəmlinin sözlərinə görə, təəssüf ki, bu gün bəzi televiziyalarda və tədbirlərdə ekspert kimi dəvət olunan adamlar bəzən o sahədən uzaq olurlar:
“Hansı sahə olursa-olsun - iqtisadiyyat, siyasət, texnologiya, mənəviyyat, humanitar, sosiologiya, media - dəvət olunan şəxs o sahənin dərin bilicisi olmalıdır. O sahədə müəyyən təcrübəyə və nüfuza sahib olmalıdır. Problemlərə yanaşmasında müəyyən standartlar qorunmalıdır. Əgər belə olmursa, onların ekspert kimi çıxış etmələrinin heç bir əhəmiyyəti yoxdur.
Amma təəssüf ki, bəzi televiziyalarda və tədbirlərdə ekspert kimi dəvət olunan adamlar bəzən o sahədən uzaq olurlar. Heç məhdud dairədə tanınmırlar. Buna görə də onların ekspertliyi ciddi qəbul olunmur. Məncə, harada olursa-olsun, biz bu məsələyə xüsusi diqqət yetirməliyik”.
Nəzrin Vahid
