“Sədərək” ticarət mərkəzinə hərəkət edən marşrut avtobuslarının sayının azaldılması ticarət mərkəzinin sahibkarlarının narazılığına səbəb olub. Bu haqda 5 avqust tarixində Trend.az məlumat verib.
Sahibkarlar bildirirlər ki, ticarət mərkəzinə müştəri axını çoxdur, lakin marşrut avtobuslarının sayı azdır. Ən çox da 211 saylı marşrut xətti ilə bağlı problem yaşanır, bu avtobusların sayı azaldığından, sakinlər yarım saat avtobus gözləməyə məcburdurlar. Həmçinin iddia olunur ki, əvvəllər şəhərin mərkəzi hissələrindən “Sədərək” ticarət mərkəzinə 10-a yaxın marşrut xətti işləsə də, son vaxtlar həmin marşrutların fəaliyyəti qəfil dayandırılıb.
Bakı Nəqliyyat Agentliyi bildirib ki, Sədərək Ticarət Mərkəzi istiqamətində 8 müntəzəm marşrut xətti üzrə (120, 126, 130, 174, 176, 164, 206 və 211) 70-dən artıq orta və iritutumlu avtobuslar fəaliyyət göstərir.
“Hazırda isə “Sədərək” ticarət mərkəzini “Xalqlar Dostluğu”, “Neftçilər”, “Qara Qarayev”, “Koroğlu” və “Sahil” metro stansiyaları ilə əlaqələndirən ekspres xəttin təşkil edilməsi istiqamətində təhlil işləri aparılır.
Bütün digər, o cümlədən “Sədərək” ticarət mərkəzi istiqamətində də müntəzəm marşrut xətləri üzrə gündəlik reysə çıxan avtobus sayı sərnişin tələbatına uyğun tənzimlənir. “BakuBus” MMC-nin istismarında olan 211 nömrəli müntəzəm marşrut xətti üzrə adi rejimdə 15-16 avtobus fəaliyyət göstərirdisə, hazırda, sərnişin tələbatının azaldığı nəzərə alınmaqla, daşımalara 10-11 avtobus cəlb edilir", - qurumdan açıqlama verilib.
