Nəsimi rayonunun Bakı küçəsi, 2 ünvanında evlərin bəziləri bir neçə il öncə sökülüb. Amma sökülməsi nəzərdə tutulan evlərin hamısının sakinləri köçürülməyib. Bu qəzalı binalarda indi də insanlar yaşayırlar. Bu haqda bu gün, 5 oktyabr tarixində Bakuplus.az ATV Xəbər-ə istinadən məlumat verir.
Sakinlərin sözlərinə görə, həmin küçədə olan ikimərtəbəli bina ilə yanaşı, bir neçə mənzil də qəzalı vəziyyətdədir. İndi sökülən evlərin yeri narkotik istifadəçilərinin və tüfeyli həyat sürənlərin sevimli məkanına çevrilib.
Bir neçə il öncə küçədə istismar müddəti bitmiş evlərin bəziləri sökülüb. Söküntü zamanı bir neçə mənzilin sakinləri kompensasiyanın məbləği ilə razılaşmayıblar. Onlar deyirlər ki, söküntü işləri aparılan zaman digər evlər qəzalı vəziyyətə düşüb. İkimərtəbəli yaşayış binasının mənzillərində də çatlar əmələ gəlib.
Nəsimi Rayon İcra Hakimiyyətinin böyük məsləhətçisi Ələsgər Rüstəmov deyir ki, 2018-ci ildə paytaxtın nəqliyyat sistemini təkmilləşdirmək məqsədilə Bakı, 2 ünvanında yola yaxın olan evlərin bəziləri sökülüb. Həmin evlər “Dəmir Yolları” QSC-nin balansında olub. Hazırda qəzalı vəziyyətdə olan evlərlə bağlı məsələnin həlli istiqamətində işlər görülür.
“Həmin evlər şəhərimizin mərkəzində primitiv, özbaşına tikilən evlər olduğuna görə hal-hazırda şəhərsalma və aidiyyəti qurumlar qarşısında müəyyən sahibkarlarla onların sökülməsi barədə söhbətlər aparılır. Qısa müddətdə nəticəsi olacaq”, - deyə Rüstəmov vurğulayıb.
Söküntü işləri gedən ərazinin səfil həyat sürənlərin və narkotik istifadəçilərinin məskəninə çevrilməsi məsələsinə gəlincə isə DİN-in mətbuat xidmətinin nümayəndəsi Nurlan Əliyev bildirdi ki, polis əməkdaşları həmin ərazini nəzarətdə saxlayırlar.
[caption id="attachment_73290" align="alignnone" width="640"]
Foto ATV-nin rəsmi Youtube kanalı[/caption]
