Azərbaycanda 400 minə yaxın qanunsuz tikili qeydə alınıb. Əmlak Məsələləri Dövlət Xidmətinin rəis müavini Rüstəm Şahbazov bu rəqəmin yaxın zamanda dəqiqləşəcəyini açıqlayıb.
O, həmçinin ölkədə neft müqavilələrinin əhatə etdiyi ərazilərdə və mühafizə zolaqlarında yerləşən tikililərlə bağlı işçi qrupunun yaradıldığını da xatırladıb: "İşçi qrupu müvafiq qanun layihəsinin hazırlanması üzərində işləyir”.
Əmlak eksperti Elnur Azadov qaynarinfo.az-a açıqlamasında bildirib ki, hüquqi normativ bazalar və bu istiqamətdə qanunsuz evlərin leqallaşdırılması ilə bağlı müvafiq qanunvericilik hazırlanmalıdır:
"Bizdə bu qanunvericilik yoxdur. Ölkə başçısının 2015-ci ildə imzalanmış fərmanı var. Bu fərmana istinadən Daşınmaz Əmlakın Dövlət Reyestr Xidməti müəyyən olunmuş qaydalar və sənədlər üzrə daşınmaz əmlakın qeydiyyatını apara bilir, vətəndaşları çıxarışla təmin edir, mülkiyyəti tanınır. Fikrimcə, müxtəlif vaxtlarda ayrı-ayrı dövlət qurumları tərəfindən verilmiş sənədlər var. İlkin sənədləri olan əmlaklar var və onların tanınması istiqamətində işlər aparılacaq. Bu isə o deməkdir ki, ilkin sənədləri olan əmlaklara yaxın vaxtlarda çıxarış veriləcək, yəni leqallaşdırılacaq”.
Elnur Azadov hesab edir ki, heç bir sənədi olmayan qanunsuz tikililərin sənədləşdirilməsi böyük prosesdir:
"100 ildən çoxdur ki, müxtəlif dövlət qurumları tərəfindən müxtəlif sənədlər verilib. Siyahı böyükdür. Onların əsasında daşınmaz əmlakın leqallaşdırılması istiqamətində iş aparıla bilər. Yəni, 400 minə yaxın qanunsuz tikilinin ən yaxşı halda yarısına şamil olunacaq. Heç bir sənədi olmayan evlərin leqallaşdırılması isə qəliz məsələdir. Bu zaman aparacaq".
Elnur Azadov sənədləşdırilməmiş evlərin statistikası ilə bağlı səslənən rəqəmin 400 min deyil, daha böyük olduğunu xatırladıb:
"Bu rəqəmlərin arasında gələcəkdə leqallaşdırılması mümkün olmayan daşınmaz əmlaklar var. Söhbət xüsusi mühafizə olunan ərazilərdə, kommunikasiya xətlərinə yaxın ərazilərdə tikilən evlərdən gedir. Bu başdan həmin evlərin sahiblərinə xəbərdarlıq etmək lazımdır ki, həmin evlər leqallaşdırılmayacaq”.
Əmlak eksperti Ramil Osmanlı isə deyir ki, neft ərazilərində inşa olunan fərdi yaşayış evlərin bir hissəsi faktiki olaraq aktiv mədən ərazisində yerləşir:
"Yəni, orada bu gün neftin çıxarılması davam edir. Amma elə evlər ki, var onların yerləşdiyi ərazilər artıq istismarı dayanıb, orada artıq neft yoxdur. Bununla bağlı dəqiq koordinatlar müəyyən olunmalıdır. Hökumətin prioritetləri ondan ibarətdir ki, mühafizə zolaqlarına düşən qanunsuz tikililər istisna olmaqla digər tikililərin sənədləşməsi qanun layihəsində öz əksini tapmalıdır. Problem o qədər şaxəlidir ki, onu qərar verilənə qədər bu məsələ tənzimlənməlidir, həllini tapmalıdır”.
