Binəqədi rayonu, Sulutəpə qəsəbəsində antisanitar vəziyyət hökm sürür. Bu haqda bu gün, 22 iyun tarixində Bakuplus.az ATV-yə istinadən xəbər verir.
Söhbət qəsəbənin “Çiçək” yaşayış massivindən gedir. Belə ki, tullantılar təmizlənmədiyindən zibillər küçənin ortasına qədər gəlib, avtomobil yolunu bağlayıb. Sakinlərin sözlərinə görə, zibillər 3-4 ay təmizlənmir. Şikayət edəndən sonra gəlib bir dəfə yığışdırıblar.
“Dəfələrlə müraciət edəndən sonra gəlib götürürlər. Sonra yenə baxan yoxdur. Qoxudan, ağcaqanadlardan yaşamaq mümkün deyil”, - deyə sakinlər şikayət edirlər.
Rəsmi qurumlar məsələ ilə bağlı bildirib ki, sakinlər zibil pulunu ödəmirlər deyə belə vəziyyət yaranır.
“Mütəmadi olaraq gəlib təmizləyirik, amma camaat yenə buranı zibilləyir. Sakinlər bizimlə müqavilə bağlasa və aylıq ödəniş etsələr, bura zibil konteynerləri də quraşdırılar, hər səhər qapıdan zibillər də götürülər”, - deyə Binəqədi rayon Mənzil-Kommunal Birliyinin nümayəndəsi bildirib.
