Bu gün AZAL-ın Bakı-Qroznı sərnişin təyyarəsi Qazaxıstanın Aktau şəhəri yaxınlığında qəzaya uğrayıb. Təyyarənin göyərtəsində 62 sərnişin, 5 ekipaj üzvü olmaqla, ümumilikdə 67 nəfər olub. Sərnişinlərdən 37-si Azərbaycan, 16-sı Rusiya, 6-ı Qazaxıstan, 3-ü isə Qırğızıstan vətəndaşı olub.
Bu hadisə insanlar arasında bir daha təyyarə ilə səyahətlərin nə dərəcədə təhlükəsiz olmasına dair sualları gündəmə gətirib.
Mövzu ilə bağlı Bakuplus.az-a açıqlama verən təhlükəsizlik məsələləri üzrə ekspert Orxan Musayevin sözlərinə görə, avtomobil və digər nəqliyyat növləri ilə müqayisədə hava nəqliyyatında baş verən qəza hadisələrinin sayı olduqca azdır:
“Bu səbəbdən də hava nəqliyyatı nisbətən təhlükəsiz nəqliyyat növü hesab olunur. Buna baxmayaraq, bəzi hallarda qəzaların baş verməsi qaçılmaz olur. Bütün dövrlərdə təyyarədən istifadə edən insanları düşündürən suallardan biri də göyərtədə hansı yerin ən təhlükəsiz hesab olunmasıdır.
Baş verən qəza hadisələrini təhlil edərkən məlum olur ki, təyyarənin quyruq hissəsi nisbətən təhlükəsiz yer hesab olunur. Bu təhlillər baş verən qəza hadisələrindən sonra sağ qalan insanların təyyarənin hansı hissəsində əyləşməsinə əsasən aparılıb”.
O.Musayev qeyd edib ki, fövqəladə hallar zamanı daha tez təxliyə olunmaq üçün qəza çıxışının yanında yerin seçilməsi də uğurlu seçimlərdən biri hesab oluna bilər:
“Təyyarənin yanacaq çəni qanadlar istiqamətində yerləşir. Yanacaqla bağlı hansısa hadisə baş verərsə, qanadlar ətrafında yerin seçilməsi ən təhlükəli variant hesab oluna bilər”.
“Baş verən təyyarə qəzalarının müxtəlif səbəbləri var. Quşların təyyarə ilə toqquşması ən uğursuz hadisələrdən biri hesab olunur. Belə ki, quşların mühərrikə daxil olma ehtimalı var. İki- üç quş daxil olarsa, mühərrikdə texniki nasazlıq baş verə bilər. Mühərrikin dərhal sıradan çıxma ehtimalı var. Quş sürüsü ilə toqquşma nəticəsində pilotun görmə imkanları da zəifləyə bilər. Bu halın da qəzaya gətirib çıxarması mümkündür”, - deyə O.Musayev fikrini tamamlayıb.
Nəzrin Vahid
