Azərbaycan Tibb Universitetinin yaxınlığında yerləşən bina narkomanların yuvasına çevrilib. Bu, Nəsimi rayonu ərazisində Nəsib bəy Yusifbəyli və Səməd Vurğun küçələrinin kəsişməsində ağacların kəsilməsi üçün əraziyə keçirilən baxış zamanı məlum olub. Bu haqda məlumatı 16 iyun tarixində İctimai TV yayıb.
Hazırda bu narkoman yuvasının ləğv edilməsi istiqamətində iş aparılır. Nərimanov rayon Mənzil Kommunal Təsərrüfat Birliyindən bildirilib ki, 12 il əvvəl sökülən tikililərin qalıqları məişət, tikinti və digər tullantıların yığıldığı əraziyə çevrilib. Eləcə də həmin sahədə tüfeyli həyat tərzi sürən insanlar gecələyir.
"Bu da öz növbəsində ərazidə antisanitar şəraitin yaranmasına səbəb olub. Çoxsaylı şikayətlər nəzərə alınaraq bu il iyunun 10-dan etibarən buradan 70 kubmetrə yaxın müxtəlif tullantılar çıxarılaraq zərərsizləşdirilib. Aparılan abadlıq-quruculuq işləri zamanı müvafiq texnikanın hərəkətinə mane olan 2 ədəd “Ayland” kolu götürülüb. Təmizlənmə işləri başa çatdıqdan sonra ərazidəki yaşıllıqlar bərpa olunacaq”, - deyə qurumdan bildirilib.
