Azərbaycanda tikinti materiallarının bahalaşması ilə bağlı məlumatlar var. Bildirilib ki, bu ilin yanvar-fevral aylarında Azərbaycanda tikinti materiallarının qiymətləri ötən ilin eyni dövrü ilə müqayisədə 3.5%-5.7% çox olub.
Yaz və yay fəslində hava şəraitinin yaxşılaşması ilə birlikdə tikinti işləri artır. Tələbin artması, daha da yüksək qiymətlərə yol aça bilər.
Mövzu ilə bağlı Bakuplus.az-a açıqlama verən Milli Məclisin deputatı Vüqar Bayramov qeyd edib ki, inşaat materiallarının qiyməti daha çox idxal qiymətindən asılıdır:
“Azərbaycan inşaat materiallarına olan tələbin əhəmiyyətli hissəsini idxal hesabına ödəyir. O baxımdan idxal ölkələrində qiymətin artması Azərbaycana gətirilən inşaat materiallarının qiymətinə birbaşa təsir göstərir. Təbii ki, nəzərə alsaq ki, artıq mart ayından etibarən biz inşaat sektorunda daha çox canlanma müşahidə edirik. Ona görə də bu həm inşaat məhsulu alan şəxslərin, həm yaşayış binaları və fərdi evləri inşa edən vətəndaşların, sahibkarların xərclərinə təsir göstərib.
Bu sahədə qiymətlərin tənzimlənməsi üçün yerli istehsalın genişləndirilməsi və daha çox yerli istehsal hesabına tələbin ödənilməsinə nail olunması çox vacibdir. Bütövlükdə bu istiqamətdə qiymətlərin optimallaşdırılmasına, tənzimlənməsinə diqqət yetirilməlidir. Xüsusən də idxal ölkələrində qiymət artımları baş verən zaman Azərbaycana təsirlərin minimallaşdırılmasına gətirib çıxara bilər”.
İqtisadçı-ekspert Xalid Kərimlinin sözlərinə görə, yaz və yay aylarında qiymətlər daha da artacaq:
“Tikinti materiallarının qiyməti bahalaşıb. Yaz və yayda tikinti mövsümü başladıqdan sonra bir qədər də bahalaşma olacaq. Bahalaşmanın da səbəbi ondan ibarətdir ki, ötən ilin ikinci yarısından dizel yanacağının qiyməti 25 faiz artıb. Benzinin də qiyməti 10 faiz bahalaşdı. Dizel ciddi surətdə tikinti materiallarının mayə dəyərinə təsir göstərir. Çünki tikinti materialları yük maşınları ilə daşınır. Onlar da dizel yanacağından istifadə edir.
Yanvarın 1-dən isə qaz və işıq qiymətləri artdı. Bu da tikinti materiallarının istehsalında xərcləri artırır. Yaz və yay fəslində insanlar təmir və tikinti işlərinə daha çox yönəldikcə, bazarda daha çox tələb yaranacaq və qiymətlərin artması ehtimalı yüksək olacaq”.
Nəzrin Vahid
