Türkan qəsəbəsinin sakinləri yaşayış evlərinin yaxınlığında zibillik yaradılmasından şikayətçidir.
Sakinlər Qaynarinfo.az-a bildirib ki, zibil maşınları tullantıları Türkan qəsəbəsinin yeni yaşayış massivinin yaxınlığına boşaldır.
"Nəticədə ərazi zibil poliqonuna çevrilib. Ətrafı üfunət bürüyüb. İy hətta evlərə gəlir. Otura bilmirik", - sakinlər bildirib.
Onların sözlərinə görə, problem bir müddətdir ki, mövcuddur. Rəsmi qurumlara müraciət edilsə də, nəticəsi yoxdur.
"Nə Xəzər Rayon İcra Hakimiyyəti, nə də Türkan bələdiyyəsi tədbir görür. Dəfələrlə müraciət etmişik, amma nəticəsi yoxdur. Ərazini xəstəlik mənbəyinə çeviriblər. Yaşayış yerinin yaxınlığında da zibillik olar? Ümumiyyətlə, tullantılar niyə məhz bura boşaldılır, məlum deyil", - şikayətçilər əlavə edib.
Onlar ərazidən çəkilmiş görüntüləri də redaksiyaya yollayıb. Həmin görüntüləri təqdim edirik.
