Milli Məclisin bu gün keçirilən plenar iclasında bir sıra mühüm qanun layihələri III oxunuşda qəbul edilib.
Bunlardan biri “Vergi Məcəlləsində dəyişiklik edilməsi haqqında” qanun layihəsidir. Bu dəyişikliklər yerli istehsal avtobuslarının satışının ƏDV-dən azad edilməsi, mədəniyyət müəssisələrinə ödədiyi ƏDV-nin 50%-nin geri qaytarılması, bərpaolunan enerji layihələri ilə bağlı avadanlıqların idxalının vergidən azad edilməsi və dəmir yolu ilə daşınan tranzit yüklərin yol vergisindən azad edilməsi kimi məsələləri əhatə edir.
Eyni zamanda, “Nağdsız hesablaşmalar haqqında” qanunda dəyişiklik edilməsi ilə bağlı qanun layihəsi də III oxunuşda qəbul edilib. Bu dəyişikliklər, iqtisadiyyatın rəqəmsallaşması və nağdsız ödənişlərin artırılması məqsədini daşıyır.
Mövzu ilə bağlı Bakuplus.az-a açıqlama verən Milli Məclisin deputatı Vüqar Bayramovun sözlərinə görə, mədəniyyət sektorunda vergi güzəştlərinin dairəsi genişlənir, eyni zamanda vergi güzəştlərindən istifadə edəcək subyektlərin sayı artırılır:
“Mədəniyyət sektorunda çalışan sahibkarlıq subyektləri üçün növbəti 5 il müddətində torpaq vergisi tam, mənfəət vergisi isə 90 faiz güzəştlə tətbiq olunacaq. Yəni sahibkar torpaq vergisindən azad olunur. Mənfəətin və ya gəlirinin isə yalnız 90 faizini ödəyəcək. Bu o deməkdir ki, mənfəət vergisi üzrə güzəşt 75 faizdən 90 faizə çatdırılıb. Bu güzəştdən istifadə edən subyektlərin sayı artırılıb. Əvvəllər subyektlərin sayı 1 idi”.
V.Bayramov qeyd edib ki, teatr tamaşaları, film nümayişi, muzey ziyarəti və simfonik orkestrin konserti zamanı göstərilən xidmətlərə görə nağdsız qaydada ödənilən Əlavə Dəyər Vergisinin 50 faizi geri qaytarılacaq:
“ƏDV-də keşbek tətbiq olunacaq. Teatr tamaşası və yaxud da film nümayişi ilə bağlı xidmət göstərirsə, orada olan ödənişlər üçün Əlavə Dəyər Vergisinin yarısı keşbek olaraq yenidən hesaba qaytarılacaq. Bütövlükdə məqsəd güzəştlərin dairəsini genişləndirmək və mədəniyyət sektorunu bu kontekstdən dəstəkləməkdən ibarətdir”.
Deputat bildirib ki, Vergi Məcəlləsində olan dəyişikliklərdən biri də bir sıra sahibkarlıq subyektlərinin vergi yükünün azaldılması ilə bağlıdır:
“Növbəti ayın 1-dən qüvvəyə minəcək dəyişkliklərdə yerli avtobus istehsalçılarına vergi güzəştlərinin tətbiqi nəzərdə tutulur. Ölkə ərazisində istehsal olunan avtobusların satışı, eləcə də hüquqi şəxslər tərəfindən təsdiqedici sənəd əsasında istehsal məqsədi ilə avtobusların ehtiyat hissələrinin idxalı 8 il müddətində Əlavə Dəyər Vergisindən azad olunacaq. Bu da birmənalı şəkildə yerli avtobus istehsalının stimullaşdırılmasına gətirib çıxaracaq.
Azərbaycan avtobusların istehsalını yaşıl iqtisadiyyat prinsipinə uyğun olaraq təşkil etmək niyyətindədir. Bununla bağlı artıq dünyanın aparıcı şirkətləri ilə danışıqlar aparılıb. Bu da nəticə etibarı ilə həmin avtobusların xərclərinin azalmasına gətirib çıxaracaq. Gözlənti ondan ibarətdir ki, bu da bir tərəfdən avtobus parkının yenilənməsi və xidmət keyfiyyətin artmasına səbəb olacaq. İctimai nəqliyyatda xidmət səviyyəsinin artmasını müşahidə edəcəyik. Vergi güzəştlərinin tətbiq edilməsi ictimai nəqliyyatda yeni qaydaların tətbiqinə imkan verəcək. Bu da nəticə etibarı ilə ictimai nəqliyyatdan istifadə edən sərnişinlər üçün yeni imkanlar deməkdir”.
İqtisadçı-ekspert Emin Qəribli isə əlavə edib ki, dəyişikliklər bugünkü dövrün tələbləridir:
“Bizim ərazimizdən tranzit keçən avtomobillərdən müvafiq vergi tutulmur. Gərək buradan keçən avtomobillərin məsrəfləri aşağı düşsün ki, yolumuzu seçsinlər. Bu da bizim ölkəmizə külli miqdarda dividendlər gətirəcək.
Alternativ enerji ilə çalışan avtomobillərin idxalında müsbət yeniliklər var. Azərbaycanda elə dövr gəlib ki, vergi güzəştlərinin siyahısını artırmaq lazımdır. Postneft dövrü yaşayırıq. Bu dövrdə yetərincə maliyyə resurslarımız var. Güzəştlə real iqtisadiyyatımızı sənaye sahəsində artıra bilərik. Biz rəqabətli bir mühitdə yaşayırıq. Qonşu ölkələr kifayət qədər güzəştlər tətbiq edir. Biz bunu da nəzərə almalıyıq.
Və vergi güzəştlərini elə tətbiq etməliyik ki, biz onlardan geri qalmayaq. Hesab edirəm ki, vergi güzəştləri çoxalmalıdır və perspektivli sahələr seçilməlidir. Əksər vergilərdən ləğv edilməlidir”.
Nəzrin Vahid
