Bakının Xətai rayonu, Cavanşir küçəsində, 116 saylı məktəbin yaxınlığında yaşayan vətəndaşlar ağacların kəsildiyi ilə bağlı şikayət ediblər. Bu haqda bu gün, 1 avqust tarixində Oxu.az məlumat verib.
Sakinlərin verdiyi məlumata görə, gecə saatlarında məktəbin yaxınlığındakı parkda tut ağacı kəsilib.
Həmçinin bildirilib ki, yaxınlıqda olan insanlar müdaxilə etməyə çalışsalar da, buna əhəmiyyət verilməyib.
Məsələ ilə bağlı Ekologiya və Təbii Sərvətlər Nazirliyinin Dövlət Ekoloji Təhlükəsizlik Xidmətinin nümayəndəsi Vaqif Cavadov qeyd edib ki, həmin ünvanda ağacların kəsilməsi barədə məlumat xidmətin əməkdaşları tərəfindən yerindəcə öyrənilib.
“Araşdırma zamanı sözügedən ərazidə ağac kəsilməsi faktının olmadığı, lakin bir neçə ağaca xəstəlik düşməsi səbəbindən Bakı şəhər Yaşıllaşdırma Təsərrüfatı Birliyi tərəfindən onlara aqrotexniki qulluq göstərildiyi müəyyən edilib”, - deyə o, əlavə edib.
