Paytaxtın Xətai rayonu, Xudu Məmmədov, 2 ünvanındakı Kaspar kimi tanınan ərazidə sakinlərə məxsus əlliyə yaxın qaraj sökülür. Bu haqda bu gün, 23 sentyabr tarixində Bakuplus.az Real TV-yə istinadən məlumat verir.
Şikayətçilər iddia edirlər ki, söküntü qanunsuz aparılır. Qaraj sahiblərinə aparılan işlərlə bağlı tələb olunan sənədlərin təqdim edilməməsi, həmçinin söküntünü hansı qurumun həyata keçirdiyini bilməmələri onları bu cür fikirlərə sövq edir. Sakinləri narahat edən digər amil isə söküntüdən sonra burada nəyin tikiləcəyidir. Belə ki, şikayətçilərin bir qismi sökülən ərazidə hündürmərtəbəli yaşayış yerinin, digər qismi iaşə obyektinin və ya qazanxananın tikiləcəyini deyir.
Həmin ünvandakı binalar 1968-ci ildə gəmiçilər üçün inşa olunub və ərazidə sakinlər üçün qaraj sahəsi də ayrılıb. Qaraj sahibləri deyirlər ki, bu yer uzun illərdir onların istifadəsindədir. Onlar bu yerin sökülməsini istəmirlər. Qarajlar üçün texniki pasportlar da var. Lakin söküntünü aparanlara təqdim olunanda sakinlərə bu sənədin heç bir mənasının olmadığı bildirilib.
Xətai Rayon İcra Hakimiyyətinin ictimai siyasi və humanitar məsələlər üzrə şöbə müdiri Pənah İmanov sökülən qarajların yerində yeni modul tipli qazanxananın tikiləcəyini bildirib. O, görülən işlərin Nazirlər Kabinetinin 26 aprel 2022-ci il tarixli 271C sərəncamına uyğun olaraq aparıldığını vurğulayıb. Həmin sərəncama əsasən, istismar müddətini başa vurmuş qazanxanalar yeni modul tipli qazanxanalarla əvəz edilir.
“Bildiyimiz kimi, bugünkü qanunlara görə, həmin qarajlar müvəqqəti xarakter daşıyır. Yəni hər hansı bir dövlət tədbiri keçirilən zaman onların köçürülməsi, onların ləğv olunması həyata keçirilə bilər. Xudu Məmmədov, 2 və digər ünvanlarda həyata keçirilən tədbirlər bununla əlaqədardır. Qaldı ki o qarajların texniki pasportu, o hüquqi sənəd deyil. Onun yerləşməsi haqqında verilən bir sənəddir”, - deyə İmanov izah edib.
Pənah İmanov, həmçinin bildirdi ki, bu cür söküntü işləri digər ərazilərdə də aparılacaq.
[caption id="attachment_71064" align="alignnone" width="640"]
Foto Real Tv-nin rəsmi Youtube kanalı[/caption]
