Paytaxtın Xətai rayonu, 8 Noyabr prospekti, 80 və 82 ünvanlarında zirzəmidən çıxan su evlərə dolur. Bu haqda bu gün, 29 sentyabr tarixində Bakuplus.az Real TV-yə istinadən xəbər verir.
Adıçəkilən ünvanlarda yerin altında boru partlaması səbəbindən içməli su evləri doldurur.
24 saat durmadan axan su bəzi sakinləri evlərinin ortasından “kanal” açmağa məcbur edib, digərləri isə zirzəmidə quyu qazır və suyu nasosla çəkirlər. Bundan əlavə, 100 ildən artıq yaşı olan qəzalı evlər nəmişlik səbəbindən aşmağa daha da meyilli olublar.
Sakinlər bu vəziyyəti “Cənnət bulağı” adlandırıblar.
Onların sözlərinə görə, binalar qəzalı olduğundan onlar köçürülməlidirlər, ancaq 30 ildən artıqdır verilən vədlər yerinə yetirilmir.
Rəsmi qurumlar məsələ ilə bağlı bildirdilər ki, artıq əraziyə briqadalar cəlb olunub və su boruları bərpa olunacaq. Yeni xətlərin çəkilməsi isə nəzərdə tutulmur, çünki ərazidəki binalar söküləcək.
