Xırdalanda itlər jurnalist Elsevər Məmmədi dişləyib.
Bakuplus.az xəbər verir ki, bu barədə jurnalist öz sosial şəbəkə hesabında paylaşım edib.
Paylaşımda bildirilir: “Dəfələrlə aidiyyəti quruma müraciət etsək də, sorğumuza ənənəvi cavabı almışıq. Abşeron Rayon İcra Hakimiyyətinə dəfələrlə AAAF Parkda və Xırdalan ərazisində kütləvi şəkildə itlərin olduğu barədə irad bildirsəm də, eyni şablon cavabı alıram. Bəlkə dəfələrlə bu mövzunu işləmişik, amma onların vecinə deyil. Bu gün itlər üstümə hücum çəkdi, bir neçəsini qova bilsəm də, biri ayağıma yapışdı, belə dişlədi. Üstəlik, məndən başqa 4 nəfəri də bu gün it dişləyib. İndi təsəvvür edin mənim yerimdə hansısa məktəbli və qadındır. İt onu nə günə qoyacaq? Amma heç kəsin vecinə deyil. Təxmini 200-ə yaxın it var. Heç kim də baxmır”.
***
Xırdalan şəhər sakinləri sahibsiz itlərdən təngə gəlib.
Bakuplus.az-a müraciət edən şikayətçilərin sözlərinə görə, artıq bu, ciddi problemə çevrilib.
İnsanlar ehtiyatla gəzirlər ki, heyvanlar sürü halında onlara hücum etməsin.
Sakinlərin sözlərinə görə, itlər əsasən Heydər Əliyev parkında məskunlaşıblar.
Bildirilir ki, onlar ən çox uşaqlar üçün təhlükə yaradırlar.
“Uşaqlarımız məktəbə gedib gələndə narahat oluruq. Çünki hər yerdə itlər sərbəst hərəkət edir”, - şikayətçi bildirib.
Məsələ ilə bağlı Abşeron Rayon İcra Hakimiyyəti ilə əlaqə saxladıq.
“Sahibsiz heyvanlarla bağlı qaldırdığınız məsələ ilə əlaqədar olaraq bildiririk ki, Abşeron Rayon İcra Hakimiyyətinin müraciəti əsasında "Toplan" Sahibsiz İtlərə Qayğı Mərkəzi tərəfindən rayon ərazisində olan ətraf mühit üçün təhlükəli ola biləcək sahibsiz itlər parklardan, küçə və prospektlərdən yığılıb. Sahibsiz itlərin tutulması sivil qaydada, onları incitmədən həyata keçirilib və xüsusi avtomobillərlə Qayğı Mərkəzinə daşınıb”, - deyə qurumdan bildirilib.
Həmçinin qeyd edilib ki, bununla yanaşı Abşeron rayonunda da Sahibsiz Heyvanlar üçün Qayğı Mərkəzinin yaradılması istiqamətində də işlər aparılır və hazırda bu işlər sənədləşmə mərhələsindədir.
