Binəqədi rayonu, Xocəsən qəsəbəsində, Ruslan Allahverdiyev küçəsində yerüstü piyada keçidi və “zebra” olsa da, yol piyadalar üçün təhlükə saçır. Bu haqda bu gün, 27 aprel tarixində Bakuplus.az Xəzər Xəbər-ə istinadən məlumat verir.
Qəsəbə sakini İlham Azayev deyir ki, piyada keçidi olmadığından onun ailə üzvlərini bu yolda maşın vurub. Xoşbəxtlikdən həyati təhlükələri yoxdur.
Ərazidə olan yerüstü piyada keçidindən isə sakinlər istifadə etmirlər. Onlar bildiriblər ki, keçidə getmək üçün səki yoxdur. Həmçinin daha öncə verilən məlumata görə, həmin keçid bir müddət əvvəl bağlanıb.
Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli bildirib ki, keçid istifadəyə yararsızdır və bu səbəbdən bağlanıb. Keçidin əvəzinə həmin ərazidə piyada keçidi xətləri çəkilib, müvafiq nişanlar quraşdırılıb. Lakin sürətli yolla hərəkət edən sürücülər çox vaxt piyadalara məhəl qoymur və “zebra” keçidində onlara yol vermirlər.
Bakı Nəqliyyat Agentliyinin rəsmisi Tərlan Səfərov bildirib ki, metronun “Xocəsən” stansiyası fəaliyyətə başladıqdan sonra yol infrastruktru ilə bağlı aidiyyəti qurumlar tərəfindən əraziyə baxış keçirilib, müəyyən təhlillər aparılıb.
“Həmin ərazidə həm səkilər, həm piyada təhlükəsizliyi, eyni zamanda geriyə dönmə yerləri ilə bağlı kompleks layihə hazırlanıb və razılaşdırma üçün dövlət qurumlarına göndərilib. Eyni zamanda sizin qeyd etdiyiniz piyada keçidinin də yenidən bərpa olunması və yol nişanının quraşdırılması üçün artıq göstəriş verilib”, - deyə BNA-nın əməkdaşı əlavə edib.
