Bakının Binəqədi rayonunun Xocəsən qəsəbəsində 348 saylı Uşaq Bağçası illərdir fəaliyyət göstərmir. Bu haqda bu gün, 23 fevral tarixində Bakuplus.az ATV News-a istinadən xəbər verir.
Sakinlərin sözlərinə görə, bağçada uşaqların təlim-tərbiyəsi üçün geniş imkanlar yaradılıb, lakin bunlardan istifadə olunmur. Bu səbəbdən vətəndaşlar məcbur olaraq ya uzaqda olan bağçalara gedirlər, ya da övladlarını, ümumiyyətlə, bağçaya göndərmirlər.
“Elə ailələr var ki, evdə əlil, qazi var, amma məcbur olurlar uşağı Sulutəpədə yerləşən bağçaya aparsınlar” - deyə sakinlər şikayət edirlər.
Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyindən bildirilib ki, uşaq bağçasına tərbiyəçi-müəllimlərin seçim prosesi yekunlaşıb və yaxın zamanlarda elektron sistem vasitəsilə uşaqların bağçaya qeydiyyatı başlayacaq. Qruplar formalaşdıqdan sonra bağça fəaliyyətə başlayacaq.
