Paytaxtın Yasamal rayonu, Mikayıl Müşfiq küçəsində antisanitar vəziyyət hökm sürür. Bu haqda bu gün, 28 iyul tarixində Bakuplus.az Real TV-yə istinadən xəbər verir.
50-yə yaxın ailənin yaşadığı ərazi zibil poliqonuna çevrilib. Sakinlər istidə üfunət iyindən, küləkli havada isə tozdan əziyyət çəkirlər. Küçədə nəqliyyat infrastrukturu da yoxdur. Baxımsız yollar çətinliklər yaradır.
“Uşaqlarımızı məktəbə aparmaqda çətinlik çəkirik, məhəllədə oynamağa icazə verə bilmirik. Çöl küçə itləri ilə qaynayır… Taksini çağırırıq, gəlmir”, - deyə sakinlər bildirir.
Sözügedən problemlər 8 ildir davam edir. 2014-cü ilə qədər burada məcburi köçkünlər yaşayıb. Onlar digər evlərə köçürüləndən sonra yaşadıqları evlər dağıdılıb və ərazi zibilxanaya çevrilib.
Rəsmi qurumlar küçədə mütəmadi olaraq iməcilik keçirildiyini, ancaq ərazinin böyük olduğundan tədbirlərin mərhələli şəkildə aparıldığını vurğulayıb.
29.07 - Yenilənib
Həmin ərazidə Yasamal rayon İcra Hakimiyyəti tərəfindən iməcilik keçirilib. Küçəyə texnika və canlı qüvvə cəlb olunub. Ərazi tullantılardan qismən də olsa təmizlənib.
