Yasamal Yaşayış Kompleksi ətrafında, Bakı dairəvi yolun kənarında yerləşən meşəlik ölümə tərk edilib.
Bakuplus.az xəbər verir ki, bunu Bakı sakinlərindən biri bildirib. Onun sözlərinə görə, Bakıda qalan 3-4 meşəlikdən biri olan bu yaşıllıq sahəsində ağaclar quruyaraq məhv olur:
“Səsimizi yayaq. Bəlkə aidiyyəti qurumlar eşitdi. Belə ki, bir zamanlar yamyaşıl və çox gözəl görüntüsü olan bu yerləri yavaş-yavaş qurudurlar. Ya da özləri qurumağa tərk ediblər. Gördüyünüz kimi ağaclar kütləvi şəkildə ayaq üstə qalmaqda çətinlik çəkir”.
Meşənin məhv olmasından narazı olan Bakı sakini bildirib ki, meşənin bərpa edilməsi mütləqdir.
“Qısa zamanda meşəni bərpa etmək lazımdır. Çünki belə bir meşənin salınması illəri çəkir. Ancaq onun məhv olması çox qısa zamanda baş verən hadisədir. Buranı binalar tikmək üçün məhv edirlər. Bilmirəm. Çünki “Kristal Abşeron” tikinti şirkətinin burada köşkü var. Niyə var? Onu bilmirəm”, - şikayətçi deyib.
Məsələ ilə bağlı Ekologiya və Təbii sərvətər nazirliyinə sorğu ünvanlanmışıq.
