Yeni Günəşli sakinlərinin yollardan şikayətçi olması ilə bağlı Bakuplus.az əməkdaşı Suraxanı Rayon İcra Hakimiyyətinə sorğu ünvanlayıb.
Sorğumuza cavab olaraq bildirilib ki, onlar tərəfdən aidiyyatı qurumlara müraciət olunub:
“Yolların asfaltlanmasına ehtiyacı olan küçələrlə bağlı Azərbaycan Avtomobil Yolları Dövlət Agentliyinə(AAYDA) rəsmi məktublarla müraciət edilib”.
Bakuplus.az daha sonra məsələ ilə bağlı AAYDA-ya sorğu göndərsə də, hələlik cavab verilməyib.
***
13:01
Yeni Günəşli sakinləri yolların bərbad vəziyyətdə olmasından şikayətçidir.
Bakuplus.az xəbər verir ki, bu barədə məlumat sosial şəbəkələrdə yayılıb.
Sakinlərdən birinin sözlərinə görə, Yeni Günəşlinin bütün yolları deşik-deşikdir:
“Suraxanı rayonunun yollarına prezident hər il milyonlarla pul ayırır. Onlar, gördüyünüz kimi, gəlib yamaq vurub gedirlər. Düz 4 il Suraxanı Rayon İcra Hakimiyyətinin köhnə icra başçısı Əziz Əzizov söz verdi ki, düzəltdirəcək, amma düzəltdirmədi. 6 ay da yeni icra başçısı Adil Əliyev söz verib, hələ ki, o da düzəltdirməyib”.
Bildirilib ki, yolların bu vəziyyətdə olması sakinlərin avtomobillərinin tez-tez xarab olmasına gətirib çıxarır.
“Mən başa düşə bilmirəm ki, bu icra başçıları Azərbaycan Avtomobil Yolları Dövlət Agentliyindən qorxurlarmı? Niyə ərazilərində asfaltlama işlərini tələb eləmirlər? Biabırçılıqdı, vallah, icra başçısı özü dəfələrlə bu yollardan keçib, bilir vəziyyət nə yerdədir. Amma bir əncam çəkmir. Bezmişik maşın düzəltdirməkdən”, - deyə şikayətçi bildirib.
