Məhəmmədli kəndi Səməd Vurğun küçəsinin sakinlərinin yol dərdi bitmək bilmir.
Bakuplus.az-a müraciət edən sakinlər bildirir ki, uzun illər əziyyət çəkdikləri yol problemi qismən düzəlsə də, indi də evlərinə gedən yolu kəsiblər.
Şikayətçilərin sözlərinə görə, bir nəfər yolu bağlayaraq divar hörüb və ərazinin həmin hissəsini aldığını iddia edir.
“İllərlə işlətdiyimiz yoldur. Təsəvvür edin ki, 12 ildir palçıqla gedib-gəlirik. Hamı da şəhərdə işləyir. İşə gedəndə utanırdıq. Burada bir qazi yaşayır. İndi ona görə yola bir az qır töküblər. İki gündür düzəldiblər. Onu da axıra qədər etməyiblər. Bir adam da çıxıb deyir ki, bu yolu kəsirəm və sizə vermirəm. Deyir, mən buranı bələdiyyə kağızı ilə almışam. Yəni neçə illər bundan əvvəl heç bələdiyyə kağızı filan yox idi. Kim gəldi torpağı götürürdü. Bu yoldan 300 ailə istifadə edir. Bələdiyyə özü də bir maraqlanmalıdır ki, bu qədər insan necə bu yoldan gedib-gələ bilər?”, - deyə sakinlərdən biri bildirib.
Şikayətçinin sözlərinə görə, yol bağlandığı üçün gediş-gəliş üçün arxa küçələrdən istifadə edirlər və bu da onlar üçün həm təhlükə yaradır, həm də yollarını uzadır:
“Gəlib buranı görən olsa bilər ki, necə əziyyət çəkirik. Uşaqlar dərsə çətinliklə gedir. Küçənin ən sonunda biz qalırıq. Axşam işdən çıxıb qayıdanda qaranlıqda itlərin əlindən keçmək olmur. Çünki bura bağlandığı üçün arxa küçədən istifadə edirik. Axı bizim öz yolumuz var”.
Məsələ ilə bağlı Abşeron rayon İcra Hakimiyyətinə sorğu ünvanlamışıq.
